新年科技預報VR夢成真
2015年科技界風起雲湧，Apple以iPhone 6s/6s Plus旋風襲港，智能手錶等穿戴式裝置繼續升溫，預計2016年多股風暴逐漸形成，當中尤以VR（Virtual Reality）、流動付款等氣勢最強。今次小記請嚟不同界別嘅IT達人，預測新一年科技趨勢，睇吓iPhone 7、VR裝置嘅「預測指數」有幾高！
應用篇：VR娛樂更廣泛
VR（Virtual Reality）其實已玩咗好多年，上年相關頭戴式裝置空群而出，包括Google Cardboard、Oculus Rift、Gear VR等。今年虛擬實境應用將更廣泛，最值得關注當然係PlayStation VR登場，預計有《真•三國無雙7》、《Final Fantasy XIV》等遊戲支援。
香港資訊科技商會榮譽會長方保僑表示：「現時VR技術已步入成熟階段，加上各大廠商已預告全力發展，相信2016年會係VR嘅關鍵年。成功與否將視乎軟件配合，例如模擬飛行和駕駛已有一定吸引力，遊戲及娛樂方面有很大潛力。」
變種智能錶
Smartwatch上年人氣有幾勁唔使多講，除咗掀起熱話嘅Apple Watch，連TAG Heuer等傳統手錶廠都推出Android Wear裝置。要突圍而出，當然要加入Gimmick，當中雙屏幕嘅Lenovo Magic View、具投影功能嘅Ritot可能係發展方向，前者於副屏幕睇到地圖等資訊，後者可投影出不同內容，解決智能手錶屏幕太細嘅問題，方保僑表示：「Smartwatch功能太多、太複雜未必適合用家，最重要靠外形和功能取勝。預計2016年傳統錶廠會大舉進軍智能市場，相信用家會有更多選擇。」
通訊篇：防爆芒iPhone
Apple一年推出一款新手機已成慣例，2016年好大機會輪到iPhone 7，不過令人期待嘅係佢有乜新功能。早前外國媒體報道，Apple成功獲得「Active Screen Protection For Electronic Device」專利，即係裝置唔小心跌落時，屏幕識得主動作出防護。手機達人三禾電氣店長Simon表示：「iPhone 7相信唔會太花巧，但造型上會有大改變，特別是更薄更輕，不過新機應該冇乜可能會喺墮地時彈出Bumper保護咁誇張，反而有可能推出外國人偏愛嘅細版iPhone。」
流動付款抬頭
經過咗咁多年，流動付款（Mobile Payment）制式終於有眉目，好似Apple Pay已於英、美等地應用，上月更突破性地宣布與銀聯（UnionPay）合作在中國插旗！而商戶毋須安裝任何裝置、兼容新舊磁卡嘅Samsung Pay，以及Google新推嘅Android Pay，亦會於2016年打開戰線，相信落戶香港嘅時間亦不遠矣！Simon表示：「流動付款於英、美、日等國家已經實行，只要將安全性提高，便可提供更多付款方式，將來出街買嘢連銀包都唔使帶，一部手機搞掂晒！」
影像篇：旗艦機質素提升
隨着手機的普及，DC市場被逐漸蠶食，各大相機廠紛紛將資源投入高階機款，下周舉行的全球最大消費電子展CES，傳聞Nikon有重大消息公布，如與Samsung合作推出全片幅旗艦無反，仲有旗艦單反登場。DCFever網站總編輯Jeffery認為：「我覺得Nikon收購Samsung NX系列嘅機會唔高，皆因大部分NX擁有嘅技術，Nikon現時已經做到，預計CES發布旗艦單反D5的可能性更高。」
至於影像質素過去幾年由全高清、2K升級至4K，YouTube甚至已支援8K影片，可見8K將會成為另一發展方向。Jeffery分析：「相信8K於2016年仍會集中於專業層面發展，當中嘅先驅應該係Sony，皆因廠方依家嘅RX系列、A7系列已支援4K拍攝，更有4K電視等顯示裝置支援，技術和配套相對成熟。」
撰文：林子聰
部分攝影：蔡浩文
模特兒：Koei（Reborn Production）