2016東京福袋檢閱

12月好忙碌，要去Gathering，要買禮物畀女朋友、男朋友、媽子、老竇，最緊要係畀自己，雖然每一日都像糧尾的狀態，但仍然無阻大家捱貴機票去日本搶福袋的計劃。東京當然是福袋戰最激烈的地點，涉谷、原宿、六本木、銀座等商場為求搶客，不僅推出不同種類的福袋，甚至老早於網上提供福袋預訂服務。以下的商場檢閱，希望幫到各位制訂「福袋戰術」，祝君買得愉快，千金散盡還復來，新年快樂。

即使福袋的衣物為女士限定，但覺得宅男們會因為女模的名字而去搶購一個。

1.涉谷109　我要做女模

雖說海港城新開了涉谷109，可能會分薄去東京涉谷109的客量，但對於去買福袋的人絕對沒有影響。商場來年的福袋將會同2位人氣模特兒 Crossover，分別是Popteen雜誌女模藤田ニコル及Vivi雜誌女模八木アリサ，兩位仲為福袋影埋沙龍，夠晒綽頭！

女模主題福袋價錢分別為￥23,000（約HK$1,471）及￥30,000（約HK$1,918），內有PUNYUS大褸、EMODA外套、MOUSSY短裙仔、one spo襯衫等，各限定出售109個，想Head-to-Toe打扮成兩位女模一樣咁嬌俏就要襯早！除了女模效應，商場內多個知名日牌如SLY、Dainy、INGNI等亦會推出限定福袋，價錢由￥1,000（約HK$64）起，喜愛日系打扮的女士們不可錯過！

八木アリサ親自為自己的福袋揀顏色，好認真！

涉谷109內8成店舖賣女裝，建議同行男士們去7同8樓的Cafe慢慢坐。

涉谷109

地址：東京都涉谷區道玄坂2-29-1

開賣時間：2016年1月2日，10:00am

網址：www.shibuya109.jp

2.三越百貨　中產貴氣福袋

一般平民心目中的福袋價錢由幾千至幾萬日圓不等，走高檔路線的日本橋三越的福袋，價錢則多幾個零，啱晒中產人士，不止多個名牌衣品的貴價福袋，更有珠寶、手錶、紅酒等，不少要過百萬日圓一個！商場另一注目品是每年推出不同種類的「夢袋」，如2015年就有8款，如試整江戶小紋染體驗（￥54,000，約HK$3,416），或來個奢侈的列車遊（￥50,000，約HK$3,163）等。

銀座三越另一體驗，於日本橋大學周邊來個「三輪車伕」遊，限定6個，價值￥12,000（約HK$759）。

銀座三越另一體驗，於日本橋大學周邊來個「三輪車伕」遊，限定6個，價值￥12,000（約HK$759）。

日本橋三越曾推出4日3夜九州「七星列車」之旅福袋，包住宿同機票，仲可以坐豪爆的王牌列車！索價￥380,000（約HK$24,040）。

日本橋三越曾推出4日3夜九州「七星列車」之旅福袋，包住宿同機票，仲可以坐豪爆的王牌列車！索價￥380,000（約HK$24,040）。

另外，銀座三越亦推出特別的「體驗型福袋」，主張以五感來享受。如舉辦「擦鞋」講座，請來專業人士教你如何保養家中靚皮鞋；或者由著名攝影師篠山紀信操刀為你同另一半拍攝婚紗照等。如此矜貴體驗，當然貴精不貴多，通常只限定10個名額內。

日本橋三越本店

地址：東京都中央區日本橋室町1-4-1

開賣時間：2016年1月2日，10:00am

網址：http://mitsukoshi.mistore.jp/store/nihombashi

銀座三越

地址：東京都中央區銀座4-6-16

開賣時間：2016年1月3日，10:00am

網址：http://mitsukoshi.mistore.jp/store/ginza/

大福袋內最吸引的是墨綠色絨布杯墊。

必買！品「排」效應

嫌去商場大海撈針太費時，不如跟番隊尾，人排你又排實冇死。以下必掃的3個品牌福袋，雖然分分鐘要排餐死，但價錢豐儉由人，主題各有千秋，總有一款可放在你的必買List中。

3.STARBUCKS

星巴克分為大、小兩款福袋，價錢分別為￥3,241（約HK$205）同￥5,556（約HK$352），小福袋內主要有咖啡豆、保溫袋、咖啡杯、禮券等；大福袋貴了百五蚊，禮品當然豐富得多，有齊小福袋的禮品外，仲有濾杯、濾紙、杯墊、保溫杯等。袋中物以外，星巴克福袋的Tote Bag亦好搶眼，而且每年也不同，如2015年的福袋就分黃色同藍色暗花菱形兩款Tote Bag，Sharp醒又實用。

去年的泥黃福袋Tote Bag，顏色夠特別。

任何一個星巴克粉絲，看到這堆禮物都一定招架不住。

東京福袋戰場一覽

開賣日期：2016年1月1日

時間：按各分店營業時間而定

網址：www.starbucks.co.jp

4.MUJI

抵買的雜貨永遠冇得輸，跟往年一樣，MUJI福袋照舊大包圍，價錢由￥1,000（約HK$64）起，主要分為紳士服、婦人服、布料系、文具及扮靚系列5大類，最正是透明膠袋包裝，唔使估估吓，讓你看到心水福袋才買走。個人則推介MUJI另一恩物「福罐」，包裝為一個紅卜卜的小鐵罐，內裏包含一件日本吉祥物小裝飾，如2015年就有來自廣島縣的鹿仔，鳥取縣的羊咩咩，島根縣的招財貓等日本山陽山陰地區的傳統吉祥物。2016年的傳統裝飾亦已公布，將會是香川、高知、岩手等16個不同縣份的吉祥物，好想儲齊30款呀！

福罐內仲有小Size Tote Bag、小量文具及吉祥物。價錢為明年年份，即￥2,016（約HK$128）。

福罐內仲有小Size Tote Bag、小量文具及吉祥物。價錢為明年年份，即￥2,016（約HK$128）。

MUJI的小物本身已經吸引，透明袋更是讓你看到合心水貨品先買，永冇中伏。

開賣日期：福袋及福罐2016年1月1日

時間：按各分店營業時間而定　　　

網址：www.muji.com

5.Apple Store

截稿時日本Apple Store尚未公布2016年會否有福袋發售，但往年是在1月2號開始發售。按2015年經驗所得，每人只可限定買一個，價錢最平為￥38,880（約HK$2,473）。2015年的終極大獎得主就抽到11吋MacBook Air、Apple TV、by Dre藍芽耳機等；二、三獎都唔輸蝕，有iPad Air 2、Beats耳機、禮品卡等，最弱雞的「安慰獎」都有iPod Touch、限量版背囊一個同by Dre藍芽耳機，聽落極吸引！有博客就在網站分享了搶買過程，例如福袋於1月2日開賣，起碼要提早兩日去排隊，記得帶夠保暖貼同乾糧，Apple工作人員也會定時定候派水同朱古力。工作人員會大約於1月1日下午開始派手帶，由於每間店只有約200個福袋，值唔值排咁多個鐘隊去博一部MacBook就見仁見智了。

個人覺得個限量版背囊吸引度是零分，不過袋中物好啱用，實用分搭夠。

為了一個蘋果，你可以去到幾盡？此為上年札幌Apple分店外的人龍。

開賣日期：預計2016年1月2日　

時間：按各分店營業時間而定

網址：www.apple.com/jp

大幸中之「不幸」袋

當你為一個心儀福袋排餐死之後，點知入面的禮物一樣都用唔着，衫又唔啱着，網友稱這類為「不幸袋」，曾有人指自己去買一個AV碟福袋，誰不知原來20隻都是一樣的AV，多到要墊煲底、枱底、梳化底。電器店亦「伏味」甚濃，有網友就試過福袋內竟然是數條不知名又沒有用途的電線，數十隻RD ROM碟、Floppy Disc等恍如隔世的過期電子零件，真係多謝晒。連鎖雜貨店Village Vanguard就曾經反高潮，推出過「不幸袋」，開宗明義叫你不要對袋中之物有任何幻想，裏面有甚麼？騎呢動漫主角文件夾、巨型假蟑螂、摺皺了的紙巾（希望唔係用過）、神社的下下籤等。截稿前Village Vanguard官網都未有公布來年有冇得買，分分鐘要等2017了。