情侶檔影聖誕4式手機攝技
下星期就到聖誕節，各大小商場已換晒聖誕裝飾，冇理由唔用手機同靚人靚景合照留念。今次請來情侶檔攝影達人Saii和Ardis，教大家用智能手機由構圖、技巧至Apps一條龍影聖誕，擺上網話咁易爆Like。
第1式：全景拍攝分身
每逢聖誕總有唔少大型裝飾，未必可以一Shot影晒，所以二人利用手機嘅全景模式拍攝環境，彌補鏡頭嘅廣角不足。
全景模式仲有另一玩法，能夠於同一張相片內玩分身，Saii手持iPhone解說：「以全景模式拍攝時只要慢慢橫掃，每掃過主體（Ardis）位置時，她便繞過我背後，走到畫面的另一個位置，影出來張相便會出現多個分身，效果有趣。」
第2式：飄雪景深Apps
用手機影相又點少得玩Apps特效，二人推介《White Christmas》App，皆因它不僅能加入得意圖像，影相時仲支援飄雪效果，至啱香港呢啲唔落雪嘅地方。另一值得玩嘅係《Big Lens》App，它能為相片加入矇矓嘅景深效果，仲可將散景變出雪花、心形、星形等圖案效果，影五光十色嘅燈飾勁有Feel。
第3式：低抄Selfie背景
每逢佳節實有機會同另一半Selfie，Saii和Ardis表示：「低角度自拍能夠影埋背後的聖誕裝飾，不過低抄很多時會見到雙下巴，所以自拍時不妨將頭部略為向前傾，甚至可戴上頸巾遮下巴，又可增添冬日氣氛。」
第4式：鏡頭玩出特效
雖然手機唔似相機咁多技巧和變化，不過都能加建廣角鏡、魚眼鏡、微距鏡等，若要拍攝大型聖誕裝置，不妨加建廣角鏡，影相時就唔使企到好後。若想畫面更為有趣，則可加入魚眼鏡令畫面變形。
撰文：黎子豪
攝影：盧展程（部分相片由受訪者提供）