大熱！港產流心芝士撻

89℃超流芝味

餅店細細原來是個臥虎藏龍之地，老闆David請來兩位曾於五星級酒店擔任總餅師的師傅坐鎮，設計出可能是全港最「流」的89℃流心芝士撻及流心牛角酥兩款招牌作。鎮店之寶89℃流心芝士撻用了5種法國芝士製作而成，既有濃郁芝士味，亦有微酸並富檸檬香氣的芝士，食落不會有膩滯感，更有清新的香味！為甚麼命名為89℃呢？師傅解釋在製作芝士餡時，會將其中兩種芝士加熱至89℃，另外3種芝士則加熱至34℃，然後將兩者混合並維持於30℃。師傅話以溫度控制令芝士餡達到出色的流心效果，口感幼滑。流心芝士撻還有榴槤味，以及將推出的抹茶紅豆芝士味呢！

牛角酥都流心

另一款招牌作流心牛角酥有藍莓及榛子兩種口味，師傅會在室溫12℃至13℃的環境下製作牛角酥，加入牛角酥麵糰的水溫不多不少只有1℃，加牛油後將麵糰重複折疊多層烤焗後，再唧入藍莓忌廉或榛子忌廉餡烘脆。新鮮出爐的牛角酥全部脹卜卜很挺身，一擘開即見流心餡料！最讚的是無論芝士撻或牛角酥都是低糖製作，食多幾個都無咁內疚。

流心牛角酥（藍莓忌廉） $18 師傅將部分新鮮藍莓打爛與忌廉拌勻，又會在餡料中加入原粒藍莓增加口感，另有榛子忌廉口味供選擇。

兩位師傅曾於五星級酒店擔任總餅師，經驗豐富又夠諗頭。

撰文：譚詠誼　

攝影：蔡浩文　

查詢電話：2706 0229