PRIV推芒按鍵 黑莓首玩Android

5.4吋OLED大芒

無論各位是否黑莓粉絲，相信對BlackBerry嘅上半截屏幕、下半截鍵盤有啲印象。PRIV嚟個大革新，除了首次換上5.4吋OLED大芒，解像度高達2,560×1,440，顯示層次分明。細心睇屏幕仲用上雙曲面設計，外形有點似Galaxy S6 edge，若果有得玩埋側屏就更好。

雖然換咗大芒，但廠方不忘招牌嘅Qwerty鍵盤，用家只要上推屏幕，實體鍵盤便會展現。難得是實體及虛擬鍵盤均支援手勢功能，向上掃可選取關聯字、右至左掃為Backspace、向下掃則轉用標點符號，打字超靈活。

機身備有5.4吋2,560×1,440解像度屏幕，配合左右雙曲面設計，夠晒型仔。	可於屏幕左側或右側長設功能欄，一掃即可瀏覽日曆、聯絡人等常用資訊。	《BlackBerry Hub》整合不同通訊及社交程式，並以不同顏色區分。

Android 5.1系統

以往黑莓手機都用上自家作業系統，雖然近年開始支援Android Apps，但兼容性始終差啲。新機終於首次植入Android 5.1系統，整體操控與一般Android手機接近，另備有BlackBerry Launcher介面，加入不少貼心功能，例如多工介面改為方格縮圖、畫面左或右側加設功能欄等。

《DTEK by BlackBerry》會檢查手機嘅安全性並作出提示，用得安心。	推開屏幕後可見Qwerty實體鍵盤，打字手感極佳。	機背採用磨沙物料，上方可見Schneider-Kreuznach認證的 1,800萬像素鏡頭。
SIM卡及記憶卡槽設於機頂，需要使用專用卡針打開。	試相區 夜間試拍時，對焦和白平衡準確，燈光位亦冇爆光，放大相片可見邊位紮實。

當然唔少得廠方嘅自家工具如通訊軟件《BBM》、整合社交帳號嘅《BlackBerry Hub》，兼顧不同用家需要。

保安全面升級

PRIV型號源自英文Privacy，廠商強調它是一部安全智能手機，所以新機加入不少保安成分，包括每個硬件都備有密鑰，配合認證功能確保內容不會被修改；另將Linux作出過千項修正提高安全性。至於優化安全監控工具《DTEK by BlackBerry》，會根據不同設定，如用家是否開啟「開發人員選項」、所下載的程式是否來自信任網站等，判斷手機整體安全性。用家亦可查看各程式的存取資料詳情，邊隻App有可疑一目了然。硬件方面則屬旗艦級數，採用Qualcomm Snapdragon 808處理器、3GB RAM，並支援4G網絡，而且3,410mAh電池的續航力達22.5小時，相當長氣。最吸引是1,800萬像素鏡頭備有Schneider-Kreuznach認證，拍攝質素有驚喜。

規格表

制式：GSM、WCDMA、LTE

處理器：Qualcomm Snapdragon 808六核心

記憶體：3GB RAM、32GB ROM、支援microSD

屏幕：5.4吋（2,560×1,440解像度）

鏡頭：（前置）200萬像素、（後置）1,800萬像素

作業系統：Android 5.1

電池容量：3,410mAh

體積：147×77.2×9.4mm

重量：192g

撰文、攝影：林子聰

網址：http://www.blackberry.com