看那一集講活化工廈的《鏗鏘集》，還有一個焦點，就是那位坐在兩個炒家旁邊、似乎是剛開始染上炒賣惡習不久的港女Cola。
Cola一開口就是金句：「女人要有磚頭囉。」沒錯，有些女人可以帶頭自我歧視，歧視自己事業上未能成功，於是只好靠炒賣磚頭。她們欠缺安全感，怕沒情人，怕沒婚姻，怕沒事業時，又怕有皺紋，動輒就心跳加速，於是買一堆磚頭回來，放在心上，有了心頭大石，心就變得平穩。
至於被問及投資心得，Cola又再顯露其天真而誠實的可愛性格，說：「Dooby Sir買邊我咪買邊囉，Anthony買邊我又買邊囉……係呀！咁咪穩陣囉！」
正！態度正確。我聽聞投資者跟「駛出真功夫」的司機大佬一樣，切忌心浮氣躁，不可驚呢驚路。學人炒賣最好抽空腦袋，不必看年報，不必看市況，更加不要評估自己承擔風險的能力，銀行咪有壓力測試囉，過到壓力測試即係得囉，財演話買邊咪買邊囉，咁就係最穩陣。點解穩陣？因為假設市況轉差，也有千千萬萬個跟住財演投資的人，和你一樣損手爛腳，到時排隊上IFC也不會太孤獨，有個伴，傾下傾下，說不定又想到下一輪投資大計。
Cola這人妙在，她不僅代表自己，她還代表了各種投資市場上佔去絕大部分的「小投資蟻」的心態。就係：你唔賺咩，人哋都賺啦，與其畀人賺，不如我閉起雙眼盲目賺啦，橫豎必賺嘛。仲有，我賺錢之嘛，又冇做傷天害理嘅事，租金起關我咩事喎，自由市場吖嘛，好公平(口架)喎。在她們眼中，你乞食呀？抵你死！
網址：www.facebook.com/linrixi