回本火鍋任食花膠靚牛

寶島秘製麻辣湯

如果有人問打邊爐最重要是甚麼，小記一定諗都唔使諗就答：湯底！打邊爐多過食白飯的香港人，總會遇過火鍋湯底如味精加水或油到好像過橋米線等的經歷。新店供應的16款湯底標榜無味精，除了沙嗲、芫荽皮蛋及番茄牛粒湯外，亦有坊間少見的潮汕湯；由大廚每日以大地魚、蝦米、豆卜、鹹菜、唐芹、大蒜、胡椒碎及豬骨等材料熬足至少10小時而成，奶白色的湯底味道鮮甜濃郁。

至於鍾意食日本料理的朋友，櫻花蝦湯可能是心水；湯底由炸香的櫻花蝦乾、紫菜和味噌等熬製，蝦味香而不腥，味道濃郁。嗜辣者不可錯過麻辣湯底，一上枱即時聞到一陣「台灣味」！原來老闆阿仁覺得香港食到的麻辣湯底多數都是用麻辣醬開水而成，味道太辣令人食而不知其味，於是特意到台灣的麻辣鍋名店如無老鍋、馬辣及鼎王等取經，鑽研出以蒜子、京葱、花椒、八角、草果、當歸及茴香等四川直送的香料，自家提煉成辣油，再與本地豬筒骨、腐皮及洋葱等熬成的豬骨湯混合而成，成品麻味溫和、辣度適中。最讚的是每枱都有一壺豬骨湯供自行加湯，不怕加清水溝淡湯底。

潮汕湯 貼近廣東人口味的湯底，以大地魚、蝦米、豆卜、鹹菜、唐芹、大蒜、胡椒碎及豬骨等材料熬製，奶白色的湯頭鮮甜帶濃香。

櫻花蝦湯底 用大量自家炸香的日本櫻花蝦加紫菜及味噌熬製，蝦味濃郁，與紫菜是絕配。

多款回本靚配料

除了無味精老火湯底外，近百款火鍋配料亦叫人喜出望外！點餐紙上一個趣怪項目「真係花膠」甚吸睛，老闆阿仁見坊間有人以魚唇、魚肚扮花膠，而他有門路用合理的價錢入到真正的花膠，故「列明正身」罷了！

肉食愛好者必吃手切安格斯肩胛肥牛，火鍋店棄用肥膏多過肉的低價肥牛，取而代之的是成本高得多的手切安格斯肩胛肥牛，肉味濃又無渣，食多幾碟已回本！其他配料亦見心思，響鈴堅持每日於店內鮮炸，上枱時仍然脹卜卜。自家製手打孜然雞肉丸，將免治雞胸肉加入孜然粉及麻油調味，肉丸口感紮實彈牙。菜芯、油麥菜、娃娃菜等全部放在雪櫃內保持新鮮度，以自助形式自取，夠窩心。

此外，每枱均設有韓式抽油煙機，加上一室強勁冷氣，食完不會一身味。任食火鍋分兩個時段，可以食足150分鐘；試業期間成人收費為$148及$128，假期前夕及周末另加$10，相當划算。

手切安格斯肩胛肥牛 用成本比一般肥牛高一成半的美國安格斯肩胛位，脂肪分布均勻、肉味較濃，回本之選！	真係花膠 坊間少有任食花膠，更有人會用魚唇、魚肚扮花膠，但老闆有門路用合理的價錢購入真花膠，女士必點。	蔬菜如菜芯、油麥菜、娃娃菜等全部放在雪櫃內以保持新鮮，並以自助形式自取。

Review

環境氣氛：3★（以5★為滿分）

好味指數：4★

必試推介：麻辣湯、潮汕湯、真係花膠

人均消費：$150

撰文：譚詠誼　

攝影：陳富權

地址：荃灣衆安街55號大鴻輝中心11樓

查詢電話：2408 3771