網上瘋傳的笑話十分之多，如果識得笑的話，真的會笑破肚皮。最新一單是某專欄作家對張學友暢銷專輯《真情流露》的評論，文中指張學友在80年代一鳴驚人後，遇上「張國榮與陳百強等偶像新人」，令「學友跟不少歌手都要暫時靠邊站觀戰」，惹來連場恥笑，亦有網民心水清留言：「希望圖書館不要將此存檔，勢必遺害流行音樂史萬年。」
每個人都會犯錯，專欄作家亦然，但不能離晒大譜。有朋友問：「編輯冇Check清楚(口架)咩？」問得真好。我總覺得，編輯是文章的美容師，負責飛沙走石改錯字，但絕不是整容師，沒責任要把一塊爛面改成一張美臉。
記得當年某人─姑且稱為「食家」─每次交稿都充滿甩漏兼狗屁不通，誇張到可以忘了食肆名字，要編輯根據內文的街名自行推敲，小編同事又偏偏太好心地，經常為其文章執拾、改寫、填漏，死了許多腦細胞，若他不是與部門高層相熟，應該早被棄用。
後來新雜誌要推出，部門老總指定要由「食家」打頭陣，吩咐大編陪同「食家」到幾間食肆進行實地試食和採訪，大編將「食家」所說的話一五一十原文筆錄不作修飾一刀不剪的寫出來。部門高層審稿後眼都凸埋，問大編：「點解篇文咁嘅？」大編答：「係『食家』親口講o架。」自此新雜誌不用再打搞「食家」，大編和小編有好日子過……
網址：www.chan-wai.com