夏日操肌Apps 搣甩豬腩肉
望住個大肚腩和手臂嘅拜拜肉，去到沙灘、船P打大赤肋都覺得尷尬。不過各位毋須自暴自棄，只要靠手機Apps，喺屋企都可以Keep Fit收身。今次搜羅了多款人氣健身Apps，包括網上勁Hit嘅高強度間歇訓練、7分鐘Workout等，讓各位擁有Fit爆身形，夏天自然可盡情騷肌！
強效篇
夜晚放咗工都要花近一個鐘跑步和做Gym，確實幾花時間。故近年興起高強度間歇訓練（High-Intensity Interval Training或稱HIIT），可於短時間內令心跳率提升，從而促進燒脂及鍛煉肌肉。
《Tabata Timer - HIIT計時器》訓練必備
由日本大學教授Izumi Tabata研究嘅Tabata訓練，可以話係HIIT最有名嘅版本，只要於4分鐘內做8組動作就搞掂，每組訓練為運動20秒、休息10秒，所以一定要用這App計時。它可設定預備時間、運動時間及休息時間，甚至循環次數及運動組數等，仲可自設背景音樂，邊聽歌邊做運動冇咁悶。售價：免費（Android）
《7 Minute Workout》聲音導航
若身體肌肉唔夠強度玩Tabata的話，同屬HIIT類別的入門版7分鐘訓練，備有深蹲、平板支撐等12個動作，每個動作做30秒、休息10秒。而《7 Minute Workout》可透過聲音導航來提示動作、剩餘時間等，全程跟住做就得；更提供運動日曆及通知提示，時刻提醒懶人操肌。售價：免費（Android）
爆肌篇
操肌都要練啱位置和方法，當中最吸睛自然係粗壯嘅二頭肌，同埋一排「朱古力」腹肌；想喺夏天爆肌的話就要集中火力狂操。
《Runtastic Six Pack Abs Workout》完美腹肌
好多人收肚腩練腹肌只係靠Sit-up，其實想練得有效率，《Runtastic Six Pack Abs Workout》提供3個等級訓練計劃，毋須健身器材輔助，當中包括側捲腹、平板支撐、登山步等動作。仲有超過50個腹肌訓練短片，詳細指導正確動作。大家可將健身成績、相片、貼士分享到facebook與他人分享。售價：免費（Android、iOS）
《Fitness Buddy》重點出擊
《Fitness Buddy》內置超過1,700個獨立訓練，涵蓋全身不同肌肉群組，針對二頭肌、臀大肌等目標集中練習。而每個動作都有短片顯示，輔以器材及文字說明等。此外，用家可揀選不同項目，除咗減重之外，仲有阻力帶、壺鈴等器材可揀，新鮮感十足。售價：$15.43（Android）、$15（iOS）
綜合篇
若純粹想瘦身、減肥、搣走贅肉的話，其實一系列輕量運動已可以保持身體健美。
《Nike+ Training Club》大牌出品
作為運動大牌出品，《Nike+ Training Club》分為不同計劃如「苗條」、「健美」、「局部」等，仲細分強度並顯示卡路里消耗量。除咗內容豐富，各位可加入facebook嘅Nike+好友，夾埋廠方嘅FuelBand運動手環一齊用，紀錄更詳盡。售價：免費（Android、iOS）
《Workout Trainer》私人教練
《Workout Trainer》內裏備有過千個Workout項目，將身體分為不同部分如腳部、胸部等進行整體訓練。每個訓練都會列出強度、時間及所需器材，而且有齊相關影片及真人語音提示，十足私人教練喺身邊。另提供3~4星期嘅運動計劃，列出每日要做嘅訓練，可惜計劃要額外收費。售價：免費（Android、iOS）
撰文：林子聰