去年朋友在紐約曼哈頓區吃過Lady M，便在友儕間巨細無遺地形容有多好味。所以呢，早前Lady M正式登陸香港海港城，大家都互相奔走問對方：「你今日食咗未？」
「我終於食咗啦……」我答。坐在某位朋友面前，我沒有勇氣告訴她，我一口氣品嘗了7款蛋糕，包括原味千層蛋糕、抹茶千層蛋糕、檸檬千層蛋糕、法式香蕉千層酥、法式芝士蛋糕、栗子蛋糕及朱古力蛋糕，就是怕她一時妒火中燒，把餐桌上的Earl Grey Tea整杯潑過來。「咁……」她猶豫半晌，才繼續問：「似唔似金龍船嗰種味道？」我腦袋一片空白：「乜嘢係金龍船？」她皺起眉頭：「哎呀，你唔記得咗以前有間金龍船餅店都有做杧果千層蛋糕咩？」
以手機上網搜尋，終於想起在我人生中曾經出現過金龍船餅店，杧果千層蛋糕確實是其招牌作。只是不知為何，我的味蕾迴避了金龍船，錯過了歷史那一頁，可能是某些賣相與包裝令我卻步，亦可能是冥冥中我是等到Lady M現身，才會在香港吃Mille Crepes。
「我唔知金龍船嗰種係乜味道，但好肯定Lady M嗰款係好好味。」我說。朋友聽後，嘆了一口大氣，再續：「你知道嗎？我同一啲同事提起金龍船，佢哋即刻話：『咁你一定過40歲嘞。』」蛋糕未有得吃，年齡遭人踢爆，對這位朋友來說，真是雙重悲哀。吃Lady M的時候，切勿提起金龍船，是為上策。
網址：www.chan-wai.com