不癡白不癡:插水

港大學生走入校委會會議,引發雙方對峙。

校委會與會者各懷心事,有些留低,有些想走人。面對群情洶湧,想走人者,也不是說走就走那麼容易,惟有各出奇謀,各找出路。

一個李博士,帶着幾分招牌笑意,笑看風雲變。期間又指學生虐待長者(意指自己),軟禁他們。少少動情,多多事實,最終獲學生放行返屋企玩轉珠遊戲。

一個盧醫生,懷疑不小心仆了在地上,人群立刻讓開察看,發覺盧醫生手抱膝頭,正在閉目養神。

事後廢青們都指盧醫生插水,「冇奶油」,我唔信,做得醫生一定係好人嚟嘅。

如果佢係插水嘅話,咁就要探討一下一般球員插水時的情況。球員插水,多用於激烈並且雙方比分相當接近的賽事上。球員受傷,無論是所謂的插水還是真傷,可大致分為兩種狀況。

第一種情況,如是被踢腳或扮被踢腳的話,除了跟盧醫生一樣抱膝呵護自己的傷勢之外,更應該把痛楚由內而外仰天長嘯抒發出來,再去番內屈住屈住咁嘅慘樣。

第二種情況,如是高空波埋嚟爭頂頭槌時頭撞頭的話,就會像盧醫生的樣子一樣,暈得相當平和。

一係抱膝大叫,一係沉默暈低,「冇奶油」係沉默抱膝的。

我不相信盧醫生是插水,因為臨時演員都係演員嚟,冇理由啲戲會咁屎。盧醫生一定是又被踢倒,又給撞頭,請大家集體為他打氣,望他早日康復。

網址:www.facebook.com/linrixi

林日曦•舊香港人