雖然我對於一批心態龍鍾的政府中人，在那次Wikipedia Wong提起《100毛》之後爭相扮睇《100毛》以表示自己貼近年輕人之心態這事感到非常不安，Branding呢家嘢就係咁，愈多男人鍾意就愈少女人鍾意，愈多老人鍾意則代表愈來愈少年輕人鍾意了，但話說回來，他們樂意演一演戲，都總比永遠以為自己高高在上較好。
田少在Facebook出名活躍，最近又到外國熱廚房一抽：「個廚係掂嘅，就多多人都肯走入熱廚房幫手！唔掂嘅就……」我家毛孩在Facebook又出招，於是公開放話：「田生，我哋公司有個空缺，係做Facebook Admin，想唔想嚟試吓？見你做得幾好……」事隔一日，田少又發功：「人工係咪高過劉華先？」
有眾人皆醉佢獨醒人士指出，大家不必急於稱讚田少，話個Facebook多半都由Facebook Admin代理。係，佢啱，但我還是覺得田少值得表揚，無論這些Post是否他本人發出，至少整個Facebook管理大方向是得到他本人同意吧，這就已經值得嘉許了。
也有政治正確人士指出，田少始終都是保皇黨，大家不要吹捧他。對，他是保皇黨，我也沒有忘記他投票支持過多少個對市民不利的法案，但我們這不是說要投票給他，只是讚揚一下他而已。他這種願意跟年輕人一起亂玩的胸襟，是難得的，你又不見高官會這樣做？有人直情避開我家主播，不讓他索取簽名呢。所以說到底，田少就是保皇得來有點年輕，值得其他人多多學習。不過話說回來，這種觸覺好像都是天生的，沒得學。
網址：www.facebook.com/linrixi