重溫NBA盛世1:6 Pippen全能拍檔

素體大幅優化

二哥柏賓Figure如其真人般低調，要待佐敦、洛文登場後，才配合Enterbay十周年於今夏推出。為隆重其事，廠方請來大師SCUDERIA為頭雕操刀，並由YJ塗裝監修。實物所見，矇眼、大鼻、厚唇以至瘦長臉頰等特徵全部跟到足，頭髮、鬚根在高清技術下也見逼真；試扭Body時更見關節鬆緊度大幅改良，也沒有了令人提心吊膽的啪啪聲，要扭入樽甫士So Easy！

主客波衫配件

今次Enterbay送齊芝加哥公牛主場及作客兩件33號波衫，配以短褲、黑白色襪子及護肘等配件，大堆頭得叫人感動。波鞋則有紅白Air Pippen II及黑白Air More Uptempo兩對，鞋形、鞋帶、坑紋以至膠底基本上真假難分，唯獨因為沒有「一剔」授權，故鞋面抽走了招牌Swoosh同AIR花紋，傳神度要扣分。配件方面有齊總冠軍獎盃、Spalding磁石波及公牛圓形地台，但若送埋1994年全明星賽MVP獎盃，配套就更加圓滿。

頭雕的五官輪廓到位，實物絕對比睇相更逼真。	Air Pippen II（左）及Air More Uptempo（右）細節位做到足，可惜冇咗招牌花紋。	柏賓（右）Figure跟番比例略高於洛文（左）及佐敦（中），動漫節期間「公牛皇朝–Big 3」組合以優惠價$4,880發售。 攤位︰F12

NBA人偶精品：巨無霸登場

奧尼爾首度採用孖裝設計，除了頭雕、巨型素體打孖上外，連波衫都有齊奧蘭多魔術及洛杉磯湖人時期兩件，絕對係珍藏級數。場內只有小量現貨，並只限動漫節期間發售，售$2,680。

換購籃球架

配件方面，今年有籃球架賣，並用上全黑色，以單一發票購物滿$6,000，或購買任何人偶另加$890即可換取。

同場加映：美漫英雄湧現

近年美漫氣勢如虹，超級英雄出完一隻又一隻，不少仲玩埋Crossover，即睇今年動漫節有乜新玩具及精品發售！

孩之寶今年推出《Combiner Wars》合體巨人「建造派」，而且仲係SDCC特別版，賣$1,799.9。 攤位︰D03	《蟻俠》限定版套裝，有齊蟻俠5個造型，尺寸由1吋至12吋不等，全套售$629.9。 攤位︰D03	Hot Toys備有大量《復仇者聯盟》 精品，如美國隊長Q版造型坐墊，售$148。 攤位︰E15~E16
台灣Beast Kingdom推出電鍍磁浮版Iron Man，整隻Mark III可凌空浮起，全港限量1,000隻，售$1,050。 攤位︰E14	威龍把DC超級英雄與Hello Kitty結合，提供蝙蝠女俠、女超人和神奇女俠3個造型，各售$238。 攤位︰D07~D10

撰文︰陳志滔

部分攝影︰蔡浩文