大鐵人17號玩具進化論

當南三郎大叫「大鐵人出動！」主題曲隨即奏起，小朋友望住電視跟住唱：「畀你知道，佢係鐵造，力量大到無譜……」唔少70後對《大鐵人17號》都充滿童年回憶，作品自誕生以來大膠、合金等產品不絕，惟獨欠缺一款擺到型格甫士嘅可動玩具。今次日廠WorldScope推出30cm高的大鐵人17號，大大隻標榜靈活矯捷，連樓上舖Ant Toy老闆Jacky都話收咗唔少訂單，作為粉絲的他都入咗一隻珍藏！

從早期POPY合金（後）、超絕可動變形版（中），到今次WorldScope版本（前），可見造型和甫士均進化。

齒輪可動關節

當戰隊系列特攝片未流行之前，70年代《百變龍》、《鐵金剛》和《大鐵人17號》可說是特攝機械人片的先驅。《大鐵人17號》之所以咁出名，Jacky話主因前兩套片嘅機械人都有人駕駛，只有大鐵人17號內置人工智能。「當年大鐵人17號係人扮，拳腳出招有板有眼，但合金玩具就做唔到咁靈活。今次WorldScope版就唔同啦，佢嘅手腳加入齒輪可動關節，而且十指可獨立扭動，擺出揮拳、劈掌等甫士都冇問題。加上腰位內藏延伸關節，拉出即可俯仰身體，髖部裙甲還可揭起，無阻下身活動，故提腿、踢腳甚至跪姿都應付自如。」

30cm高大威猛

WorldScope版大鐵人17號有成30cm高，Size拍得住1:4 Figure，拎上手極之紮實。Jacky大讚：「最正係佢嘅比例拿捏準確，充滿特攝味道，而且機體紅色組件如胸甲、小腿前方、腳掌表面均以Die-cast鑄造，令玩具都幾墜手。」此外，為了重現劇中打開腹部使出絕招等離子炮，玩具加入換件玩法，想扮發射Look時可於腹部改裝「開啟形態」，咁就唔怕玩得耐會鬆。

下身關節靈活，單腳踢腿都唔會失平衡。

膊頭設有橫向關節，能夠做到聳肩動作，而格仔雙眼塗裝精準。

以換件方式重現絕招等離子炮的發射狀態。

大膠POPY各具賣點

其實歷年來有關《大鐵人17號》的玩具，Jacky都有收藏，他直言不同時期的玩具都帶來不一樣的回憶。「孩童時拿起大膠大鐵人17號尤其興奮，因為玩具同自己身高差唔多，膊頭仲識發射飛彈，搞到經常丟失配件；POPY合金雖然細隻，但是合金含量最多，玩到甩漆都唔驚氧化變得脆弱。至於超絕可動變形版顧名思義可跟足原著變形方法，一按鍵由飛行要塞變成機械人，可惜易壞問題為人詬病。」