Father's Day 因「父」之名
今日係Father's Day，除了子女對父親表達敬意的日子外，其實Father仲可以解作各個界別中最重要、開創先河嘅領導人物。今日小記就為大家細數動漫、遊戲、玩具和科技各界別之父，大家又對這些與生活息息相關的人物有幾多認識呢？
宮本茂 Mario人氣生招牌
要數全球銷量最多嘅電子遊戲，《Mario》系列定必榜上有名。主角Mario頭戴紅帽、身穿藍色工人服，首見於1981年嘅《Donkey Kong》遊戲，而此遊戲嘅監督、美術、角色設計統統由宮本茂包辦，故他亦被稱為Mario之父。Mario原本只係《Donkey Kong》嘅配角，點知推出後角色一炮而紅。時至今日Mario依然係任天堂嘅生招牌。
久多良木健 PlayStation業界經典
1994年面世嘅PlayStation，全球累計賣出超過1億部，可說是次世代遊戲機嘅代表作。而久多良木健當時任職Sony Computer Entertainment嘅CEO，亦係PlayStation開發計劃重心人物，其後於2000年推出後繼機PlayStation 2再度大賣，成為遊戲界經典。
Stan Lee創作超級英雄
美漫超級英雄近年大熱，其實Spider-Man、Hulk、Thor、Iron Man等經典角色均由Stan Lee與一眾藝術家聯手創作。呢位美漫英雄之父，自《Fantastic Four》爆紅之後，陸續創作《X-Men》、《The Avengers》系列角色及漫畫，過癮的是Stan Lee經常於超級英雄電影入面客串角色，眼利嘅各位會否覺得佢熟口熟面呢？
手塚治虫 日本漫畫大師
提起《小飛俠阿童木》、《怪醫秦博士》、《三眼小子》等，相信大家定會諗起手塚治虫。呢位日本漫畫大師早於1946年開始連載四格漫畫，亦係戰後日本首位創作漫畫故事之人。1950年開始憑《小飛俠阿童木》等作品嶄露頭角，其後仲將它製成日本首部電視卡通片。同時亦孕育了不少助手，包括藤子.F.不二雄、石之森章太郎等漫畫家。
村上克司 超合金概念成真
擁有超合金玩具，係不少70、80後男孩嘅願望。其實「超合金」這個名詞，係源自1972年嘅《鐵甲萬能俠》漫畫及電視卡通，入面嘅機械人以「超合金Z」物料鑄造。當時擔任BANDAI專務嘅村上克司，便想到將這概念轉為現實，開發出一系列金屬機械人玩具。而首款超合金於1974年面世，正就是鐵甲萬能俠。
Ole Kirk Christiansen Lego風靡全球
風靡全球嘅積木玩具Lego，由丹麥木匠Ole Kirk Christiansen設計。起初他以木玩具成立Lego公司，至1949年開始製作可自由組裝嘅塑膠積木，之後大受歡迎。時至今日Lego推陳出新，甚至有相關電影、主題公園等，變成一種玩具文化。
Alan Turing 電腦科學先驅
早前上映的《解碼遊戲》，改編自Alan Turing傳奇，他於二戰期間研發出電子機器，協助軍方破解德國密碼系統Enigma，而此機更被視作電腦的原型，更提出圖靈機及圖靈測試理論，破天荒為電腦科學理論作清晰界定。
高錕 光纖通訊之父
喺香港提起乜乜之父，唔少人第一時間會諗起光纖之父高錕。早於60年代高錕已研究以玻璃纖維傳送訊號，及後成功研發出光纖通訊，令訊息傳輸速度大幅提升，亦令全球網絡有革命性改變，光纖的應用範疇亦變得更廣。
Martin Cooper 手機開發始祖
手機已成為人們不可或缺之物，其實初代手機有成個水壺咁大，於70年代由Motorola總經理Cooper研發。1973年他帶着首部「Mobile Phone」於曼哈頓街頭致電貝爾實驗室，開創了歷史，直至1983年推出市場。
Rudolf Diesel 發明柴油引擎
德國工程師Rudolf Diesel係柴油引擎嘅發明人，1892年開始研究，5年後成功製作出煤油壓縮點火式內燃機，及後再改用柴油為燃料，亦即為柴油引擎的原型，今時今日全球有大量交通工具使用柴油引擎呢！
撰文：林子聰