高貴女神Natasha Poly

Natasha Poly

第一眼望落去好搶眼，佢好高，有super model身形，加埋呢條裙令佢身形更高挑，盡顯人魚曲線，呢條裙有女神感覺，條裙好完美，超deep V好難carry，高衩設計啱啱好，好高貴，一啲都唔cheap。

January Jones 瀟灑型格

佢唔算高瘦比例，但着得好均勻，佢呢身套裝好搶眼，加埋佢襯嘅頸鏈好隨意，好瀟灑，好型格，不失女性化，最靚係佢對鞋，係神來之筆，令佢造型更突出。

Victoria Beckham 造型沉悶

一貫佢嗰種貼身造型，條裙唔特別，我唔覺得佢好靚，可以讚嘅係佢本身唔高，條裙將佢身形拉長，有啲沉悶，呢個髮型唔襯着呢啲晚裝裙，一個貼伏嘅髮型更有時代感。

Lily Aldridge 迷人V衩

幾好睇，黑裙上V下V啱啱好，呢幾季歐洲興長袖晚裝款，我鍾意裙款長度，睇上去啱啱好，好修長，對鞋襯得好絕，尖頭鞋簡單時尚，唔使涼鞋咁女性化，尖頭鞋永遠都最有型。

Karlie Kloss 簡約U領

佢着得幾好睇，U領低胸款冇乜人着到，平胸骨感先着得sexy，同埋我鍾意佢好簡單隨意，唔係set行頭，化濃妝先好睇，我唔鍾意啲女仔着晚裝化濃妝，簡單自然先會散發到美感。

Gigi Hadid 全金俗氣

成個感覺好似黃金俠，唔算最靚，不過其實呢啲連身褲真係好難carry，要讚就係佢比例好均勻好fit，件衫感覺俗氣，我覺得着全金，唔會加一個金色手袋，我會襯螢光色。

Kim Kardashian 自暴其短

我覺得佢着件衫嘥咗，佢本身大隻身形，着咗好肥，雖然佢全黑打扮，但效果一般，最怪係短褲打底，隻腳望落去好肥好粗，我覺得佢冇咁上下高度就唔好咁着，自暴其短。

Ricky 郭慶彬

星級造型師郭慶彬（Ricky）的配搭功架深受女星讚賞，是型媽吳君如、「大美人」李嘉欣與「玉女掌門人」周慧敏等的御用造型師，在業界備受肯定。Ricky亦是一眾品牌之友，經常被各大品牌誠邀出席米蘭與巴黎時裝周，還會為品牌在活動上充當講師，與VIP分享與傳授配搭之道。