你感覺時間過得愈嚟愈快，係因為你已經失咗身，冇晒啲第一次。
長大後嘅生活，愈嚟愈少第一次，換番嚟嘅係重複又重複咁校鬧鐘，重複又重複咁賴床，重複又重複咁返工；連拍拖都一樣，重複又重複咁行街，重複又重複咁睇戲，重複又重複咁食飯。呢種重複又重複嘅生活，就好似《越難越愛》「點解嘅」一樣，非常洗腦，記憶點相對較少，於是令人有時光飛逝嘅錯覺。
解決辦法，其實唔難。
做人唔好墨守成規故步自封，乜都試吓，體驗多啲第一次。放假去日本呀南韓呀係好爽，但都可以搵次試吓去北韓？
朱古力雪糕係好味，但可以搵次試吓食屎味雪糕？
返緊呢份工係好穩定，但你做得唔開心，咪辭職囉。辭職咁邊個養你？冇o架，又唔係窮到要立即乞食，咪辭咗先算。就算乞食，你都係第一次乞食，咪當係體驗。
久而久之，多咗第一次，你先會多番啲記憶點；多咗記憶點，第時你諗番轉頭，先唔會覺得2014年同2015年過得一模一樣；唔再覺得年年過得一模一樣，你先可以感覺到啲時間慢番落嚟……
依循我的方法，臥薪嘗膽，品味爛橙。好的壞的都要嘗盡，讓自己不致在重複中消耗生命。
喂人生只得一千零一次，沒時間給你考慮那麼多，做啦。不知如何開始？先想想自己最想做甚麼，不要再多想那是不是最想，就做第一件浮現在你腦海中的事。明天開始，你就可以慢慢地過一種新生活。
網址：www.facebook.com/linrixi