Aivvy Q智能耳機觸控聽歌

傳統耳機需要連接手機或音樂播放器才能播歌,但來自集資網站Kickstarter嘅新產品Aivvy Q卻打破傳統,毋須連接任何裝置都可以自己播歌,識得記錄用家音樂喜好來換歌,甚至以語音提示用家所選功能。

獨立播放

2014年成立嘅新品牌Aivvy,於Kickstarter集資研發Aivvy Q耳機,日前喺香港搞發布會讓傳媒率先試玩新產品。驟眼睇佢同一般無線耳罩式耳機冇乜分別,用上40mm單元、皮革頭帶及海綿耳罩。但它卻整合音樂播放器,內置32GB記憶體,可於雲端資料庫預先儲存一定數量嘅音樂,以供離線隨機播放,非常方便。當用家覺得歌曲啱聽,便可輕按耳罩右邊嘅觸控板,唔啱聽時一掃即可跳播歌曲,又或者轉動右邊耳罩嘅轉輪,以轉換不同歌曲頻道。

網上訂購

Aivvy Q另一賣點是可儲存用家的音樂喜好,每當耳機接駁電源時,除了進行充電外,還會連上預設嘅Wi-Fi網絡,將用家喜好與雲端資料庫同步;經過系統分析後,便會從歌庫嘅4,000萬首歌曲中,揀選適合曲目傳至耳機,確保大家啱聽!廠方表示,歌曲涵蓋不同語言包括英文、國語、廣東話等,未來會繼續增加數量。各位想擁有的話,可於4月23日或之前到Kickstarter網站預訂產品,網址為https://www.kickstarter.com/projects/186324738/aivvy?ref=discovery。

撰文:林子聰

攝影:胡振文