M3s三軸雲台手機拍得穩

近年樓市、匯價、政策都興用「維穩」字眼，估唔到手機都要「維穩」，事關不少人鍾意拎住手機邊行邊拍片，結果拍出嚟震過貓王，睇到頭都暈！SwiftCam M3s手持雲台為此而生，不但兼容大小智能手機，仲支援三軸防震及3種拍片模式。小記試玩後發覺影片好似落咗專業滑軌咁定，就算索價二千多元，看來呢筆維穩費都要畀！

售價：$2,780（a）

適合大芒手機

電動雲台並非新鮮事，坊間不乏為GoPro等Action Cam而設的款式，但用佢哋嚟夾實手機，平衡感及穩定性始終未能盡善盡美。SwiftCam M3s由一支手柄及一個旋轉基座組成，只要輕輕拉開頂部的彈弓機關，便能把4吋至5.7吋嘅智能手機裝落去。考慮到較重的手機容易使重心偏離，隨盒還附送天秤砝碼，套入基座後便能平衡重心，設計周到！

高扭力電動摩打

M3s另一賣點係設定簡單，用戶除了可透過手機App，將手機型號、重量等資料傳至系統，讓雲台自行定位外；安裝後只要長按手柄Joystick兩秒再扶正手機，系統亦懂得自動校正平衡，啱晒新手使用。實際應用方面，藉着高扭力電動摩打，它可水平旋轉360度及前後翻滾270度，配合三軸防震技術，能抵銷鏡頭在左右旋轉、上下挑動或前後移動時的震動。小記試玩後發覺點揈點郁都唔會使機身大幅搖擺，拍出來嘅影像非常穩定，極具電影感。

M3s由手柄及基座組成，前者微微彎曲，後者設彈弓機關。

以3枚電池推動，並附送專用USB充電器。

由於不同手機的重量不一，可透過天秤砝碼保持平衡。

3種拍片模式

「維穩」以外，它提供3種拍片模式，一按Joystick即可切換，並以藍、綠、橙3色燈號顯示。藍燈是「全跟隨模式」，畫面會隨手柄方向移動，營造出流暢的移動效果；綠燈是「平移模式」，上下軸心被鎖定，鏡頭可緩緩左右移動，Pan鏡必備；橙燈則是「全鎖定模式」，無論用家點郁，鏡頭也專注於一個方向，啱晒追蹤拍攝使用。而Joystick能用於控制基座上下左右移動，令取景更多元化。