天文攝影狂熱探索深空奧秘
上星期難得喺香港睇到月全食，吸引到唔少人「打月光」，更掀起一陣貼相熱潮。如果錯過咗都唔緊要，皆因天文攝影嘅種類有好多，例如銀河、星軌等，不過講到發燒級肯定要數深空天體攝影（Deep Sky Object），今次一於請香港天文學會嘅攝影達人Schindler Leung，教大家一路拍攝一路探索「深空」奧秘。
4月影夏季星系
近年愈來愈多人影深空天體，事關呢類題材用肉眼根本睇唔到，需要透過長時間曝光和後製相片，故作品既富挑戰性又有成功感。Schindler表示：「其實深空天體一年四季都影到，分別在於拍攝嘅星體不同，好似4月深夜時分能夠影到夏季星系如獅子座、處女座等。而星體每日嘅位置會推前4分鐘，換言之想第二天在同一位置拍攝同一星體，就要早4分鐘啦！初學者較適合拍攝夏季星系有M8~M20星雲，事關其面積夠大又夠Colorful，唔使超遠攝鏡頭都影到。」
避免光害影響
比起其他天文攝影題材，深空天體對環境有一定要求，最好在全黑下拍攝，Schindler解釋：「相比台灣等地，香港的光害都幾嚴重，不僅大廈和街燈的燈光，連手機、電筒一點點光都會影響到作品，所以喺香港影深空天體可揀嘅地方唔多，主要集中在西貢一帶，例如北潭涌、東壩、天文公園等，但唔代表向住海就一定冇光害，有時船隻的燈光都會破壞作品。」他建議相機要拆除低通濾鏡，並加入防光害濾鏡以減低影響。
赤道儀向北極星
準備好相機之後，其實仲有好多輔助裝備如赤道儀、導星鏡等，加加埋埋重量超過25kg，而安裝過程大約需時20分鐘。「拍攝前必須將赤道儀的水平位置和平衡校準，再利用裏面的極軸望遠鏡對準北極星，透過控制器的GoTo功能可自動搜尋想拍攝的星體，如果事前校正唔準，影出來就有機會出現『拖線』。」
疊相原理合成
其實深空天體作品是利用疊相原理製作，Schindler道：「發燒友大多會用上間隔拍攝，每次曝光數分鐘，視乎環境、星體的光暗而定，總曝光時間最理想為2至3個鐘，有人甚至會用幾晚時間去曝同一個星體，總而言之就係『多多益善』啦。」之後再透過《DeepSkyStacker》軟件將多張相片合併而成，並過濾畫面上的雜訊，再以《Photoshop》或《Lightroom》執相，主要調校局部光暗及強化對比度，令主體更突出。
「追星」器材一覽
香港沒有專賣深空天體拍攝器材的專門店，故Schindler推介大家到網站如Tan14.com或Grandeye.com.hk搜購。
赤道儀
主要用作抵銷地球自轉，並可隨着天體轉動，入門型號由$6,000起，圖中Schindler用的進階型號約售$18,000。
控制器
隨赤道儀附有的控制器內置星圖軟件，當中GoTo功能只要輸入星體名稱，便能自動搜尋星體。
導星鏡
用作觀測拍攝方向的天體，一旦導星偏離正確位置即可糾正，可配合天文用CCD將導星鏡的影像轉為數碼訊號，兩者售價約$3,000起。
其他天文攝影
天文攝影博大精深，除了進階的深空天體拍攝，還有銀河、星軌、月食等種類，由於對攝影器材和環境要求冇咁高，對有興趣接觸天文攝影的新手，是不錯的拍攝體驗。
銀河
以魚眼鏡再配合追星儀拍攝，曝光時間為80秒×11張，然後利用軟件合成，能夠表現出顯眼的銀河，攝於大嶼山水口。
星軌
攝於船灣淡水湖的星軌作品，只需使用一般腳架，利用間隔拍攝功能即可，每張曝光時間約40秒，透過軟件合成便能將星星拉出長長軌迹。
月食
使用1,000mm超長焦距和3.2秒慢快門拍攝，配合赤道儀抵銷地球自轉，便能夠拍攝清晰仔細的月全食，這作品上星期攝於粉嶺。
Schindler's Profile
擁有十多年天文攝影經驗，現為香港天文學會培訓部部長，曾多次於香港太空館演講，亦為Canon Institute of Creative Imaging之攝影班導師。
網址：http://takephoto.info
撰文：黎子豪
攝影：莫文俊（部分相片由受訪者提供）
模特兒：Melody（Zmodel）