達人傳授三式萌攝「兔」路
香港地唔少人都有飼養寵物，主人更愛為佢哋影低一輯輯靚相，而呢期主角當然係萌爆的復活兔！所以今次請來寵物攝影師Percy Chan，齊齊去到保護遺棄動物協會（SAA），講解一下影兔仔的技巧，有興趣影小動物的你不妨趁機取經喇！
第一式：先互動 後舉機
好多人見到動物趣致的一面，都會第一時間拎起相機瘋狂影相，其實大家有冇過佢哋係咩心情，又或者願唔願意，Percy強調：「若然動物在不情願的情況下，千祈唔可以夾硬影相，更加唔好嘗試喝罵或者打佢哋，事關有機會對動物造成心理陰影，見到相機會驚。」他補充：「無論兔仔抑或其他動物，本身都會有情緒，所以拍攝前應觀察一下，又或者同佢哋互動交流，先至再舉機影相。」
第二式：採用顏色對比背景
影動物是一件相當困難的題材，皆因動物太活躍，要捕捉可愛的瞬間並非容易，Percy表示：「由於兔仔冇貓狗咁活躍，所以拍攝的難度相對較低，如果想兔仔望住鏡頭，可以嘗試用兔糧或乾草，吸引佢哋注意力，若然對象是貓狗，用膠袋製造出『沙沙聲』，都係個唔錯的方法。」至於拍攝的背景，建議選用家花花草草等野外環境，不宜太雜亂，亦避免跟動物撞色，例如白色兔仔就唔好用白色背景襯托，盡量採用顏色對比。
第三式：側光、背光顯層次
無論影咩動物都好，只要留意光線、角度和焦距這三個要素，就唔難影到靚相，Percy指：「多用背光和側光的採光手法，會令動物更加立體和有層次，而且唔好用閃光燈直打，皆因會傷害兔仔的眼睛，應該用反射的方式，例如將光線射牆或者天花板，最理想就梗係用天然光。」構圖方面，Percy建議大家唔好淨係影正面，可以嘗試以正側面、頭頂影過去，甚至以一些前景作配襯，配合長焦距鏡頭，令兔仔唔會有壓迫感。
寵物攝影師Percy Chan小檔案
擁有十多年動物拍攝經驗，拍攝的動物題材廣泛，任職保護遺棄動物協會（SAA）攝影師、攝影班導師及平面設計師，還有HKPA的修圖導師。
網址：www.percy-chan.com
相機推介
以前影動物又要跪低又要瞓身，自從不少相機加入多角度屏幕設計，以高低角度影動物就輕鬆得多，一於睇睇有咩推介。
高畫質之選Nikon D750
Nikon D750備有3.2吋122.9萬像素的翻揭式屏幕，能夠高低角度取景，而且內置FX格式的2,432萬像素感光元件，吸光力強之餘，影兔仔又容易營造淺景深效果，加上每秒6.5張的高速連拍，要捕捉活潑好動的小動物冇難度。
穩定之選Sony α7 II
具備3吋123萬像素多角度屏幕的Sony α7 II，亦有利高抄低拍，而且具有2,430萬像素的全片幅感光元件，畫質細膩又實淨，再配合內置的5軸防震系統，就算在昏暗的環境影兔仔，都可以確保畫面清晰穩定。
的骰之選Panasonic Lumix GF7
機仔細細的Panasonic Lumix GF7，都有一塊3吋104萬像素的屏幕，而且加入多種自拍功能，同兔仔玩自拍Easy Job。加上提供ISO 25,600高感光度，就算唔用閃光燈，都能夠保持較快的快門速度影兔仔。
會長有Say：保護遺棄動物協會創辦人El Chan
保護遺棄動物協會為政府認可的慈善團體，以 「愛護動物‧尊重生命‧不殺不棄」為宗旨，創辦人El表示：「協會現在收留了三百多隻動物，而絕大部分都係被遺棄，而協會只係佢哋一個暫時性的居所，若然大家想幫佢哋，可以考慮將佢哋領養返屋企，就算無法領養，亦都可以成為領犬員出一分力，最重要是人們應該對動物不離不棄，做到相處共融。」
網址：www.saa.org.hk
撰文、攝影：黎子豪（部分相片由受訪者提供）
模特兒：Charlotte（Pure Models）
場地提供：保護遺棄動物協會