5.5吋GALAXY A7 長假雙卡遊

復活節長假就到，小記身邊唔少朋友已計劃去旅行，仲諗住帶部雙卡機插Data SIM，慳番啲漫遊數據費用。Samsung新推出的GALAXY A7，不但兼容中港3G及4G網絡，仲提供5.5吋全高清靚芒及豐富拍攝美顏功能，唔嫌佢貴少少的話不妨考慮一下。

售價︰$3,698

全高清靚芒

近年雙卡機漸受大廠重視，GALAXY A系列便是Samsung的新戰線，當中最新的A7實為去年底A5的放大版，屏幕擴大至5.5吋，連解像度也提升至1,080p。機身放大後，重量無可避免加至141.7g，感覺較以前墜手，加上屏幕拉闊也減低單手操作的靈活性。幸好其厚度僅6.3mm，可輕鬆放進褲袋之中。同時電池亦加大至2,600mAh，並支援超級省電模式，一般應用絕對夠玩一天。

支援中港4G

去得旅行，影張「到此一遊」靚相是常識吧！新機配備1,300萬像素後置鏡頭及500萬像素前置鏡頭，後者對應106度廣角模式，Selfie連九頭身都影埋，女士必Buy！另支援美顏模式如美肌、美瞳、瘦臉，全部有8個級別調校，唔化妝都靚爆鏡。雙卡模式方面，它兼容香港FDD-LTE及內地TD-LTE網絡，並可透過軟件選擇以SIM 1或SIM 2接收4G，換卡自然輕鬆好多。雖然定價$3,698比對手貴得多，但大廠出品兼率先用上Snapdragon 615 64-bit八核心處理器，計落都算合理。