Nikon Vs Canon 長炮狙擊木棉花

COOLPIX P900 83倍最強傳說

Nikon設計長炮DC向來有一手，好似上年年頭推出嘅COOLPIX P600，其60倍Zoom稱得上當時變焦能力最勁嘅DC，可惜其寶座話咁快就被其他廠嘅65倍Zoom爬頭，奪去「最強長炮DC」美譽。當大家以為廠方會加推70倍、75倍或80倍反擊？全部估錯晒！剛抵港嘅COOLPIX P900變焦能力足足有83倍，仲有打雀模式、打月光模式等，影木棉花簡直Easy Job。

COOLPIX P900規格表

感光元件：1,610萬像素CMOS

焦距：24~2,000mm

光圈：F2.8~6.5

屏幕：3吋92.1萬像素

感光度：ISO 100~6,400

體積：139.5×103.2×137.4mm

重量：899g

PowerShot SX60 HS 65倍走天涯

Canon嘅長炮DC總係緊貼市場需求，變焦能力同影像技術均名列前茅，喺對手嘅COOLPIX P900未出現前，65倍變焦嘅PowerShot SX60 HS仲做緊「一哥」，最煞食係佢擁有21mm超廣角，用嚟影風景Wide Shot一流。其他功能亦相當齊備，包括3吋側揭式屏幕、Wi-Fi及NFC功能等。今年年頭仲劈一劈價，由原來四千幾減至依家三千尾，抵玩咗好多。

彈出式閃光燈照射範圍最遠為11.5米。	P900備有3吋側揭式屏幕，取景輕鬆靈活。	PowerShot SX60 HS 售價：$3,880（b）

PowerShot SX60 HS規格表

感光元件：1,610萬像素CMOS

焦距：21~1,365mm

光圈：F2.8~6.5

屏幕：3吋92.2萬像素

感光度：ISO 100~3,200

體積：127.6×92.6×114.3mm

重量：607g

第1回合：Zoom鏡鬥穩定

今次Nikon同Canon兩大旗艦長炮DC都配備3吋翻揭式屏幕，安裝喺腳架後可扭個芒出嚟取景。不過揀得長炮DC影木棉花，都係貪佢輕巧便攜，一於試吓佢哋手持Zoom到最遠會否震過貓王啦！P900內置雙重偵測光學減震技術，支援五級防震，用盡2,000mm影相時畫面都幾定；而機旁設有快速返回變焦鍵，好容易可以搵番主體。至於SX60 HS植入混合型影像穩定技術，配合遠攝構圖輔助鍵同樣可輕易搵到主體，不過佢Zoom到最遠都只係得1,365mm，論遠攝能力始終輸蝕咗啲。

內置閃光燈的照射範圍最遠可達5.5米。	SX60 HS提供3吋側揭式屏幕，以便高低角度拍攝。	第1回合 Win P900內置雙重偵測光學減震技術，手持夠定，並提供2,000mm焦距。

第2回合：成像鬥畫質

機Gor向來最重視Quality，任你Zoom到幾遠都好，影出嚟嘅相偏色同散晒，真係貼錢都唔會用。今次兩機均屬大廠出品，當中P900保留到Nikon一貫嘅銳利風格，線條實淨之餘，連木棉花的花蕊都睇得清清楚楚，而且整體風格硬朗，適合配襯簡單的背景。SX60 HS亦繼承了Canon嘅優良傳統，飽和度較高令色彩感濃郁，高反差表現成像細膩，無論是樹幹細節抑或花瓣都表露無遺，相片極富層次質感。

SX60 HS支援混合型影像穩定技術，影木棉花不會鬆郁朦，可伸延至1,365mm焦距。	第2回合 Draw P900的色水忠於原色，而且銳利度夠高，樹枝和花蕊都睇得清楚。	SX60 HS表現出鮮艷嘅色彩，細看之下花瓣有光澤又有質感。

第3回合：濾鏡鬥玩味

好多人影相都會加入濾鏡效果，P900提供9種特效包括柔和、懷舊、保留特定色彩等。而SX60 HS亦有8種之多，最重要係內置創意拍攝模式，一按即可衍生出6種效果，夠晒驚喜。由於兩機均支援Wi-Fi及NFC功能，梗係要用埋App嚟玩吓啦！P900用嘅《Wireless Mobile Utility》，提供嘅參數詳盡，不過機Gor透過App嚟變焦時，畫面會窒吓窒吓，唔夠Smooth要扣分。而SX60 HS所對應嘅《Canon Camera Connect》，基本功能差唔多，不過多咗條Bar嚟拉動變焦，想Zoom到最遠影木棉花一拉搞掂。

P900的濾鏡特效有9種之多，當中保留特定色彩可Keep到木棉花嘅紅色。	《Wireless Mobile Utility》App資訊齊全，光圈快門等樣樣有，唯一挑剔係變焦時窒吓窒吓。	第3回合 Win SX60 HS有8種濾鏡特效，並提供創意拍攝模式，按一下快門即有多種效果。

達人教路：人氣facebook攝影群組流浪攝：「多重曝光增加創意！」

「由於木棉樹相當高大，就算以長炮DC由樹底拍上去都未必影得靚，故應選擇天橋等高處為站立點，便能以較水平嘅角度拍攝，仲唔使長時間抬起個頭添！此外，除咗玩濾鏡特效為相片增加創意外，影木棉花亦不妨以多重曝光，為木棉花加入簡單構圖，合併出有意境嘅畫面。」

《Canon Camera Connect》介面簡潔，要一讚中間有條變焦Bar，一拉便可由廣角Zoom到遠攝。

放大圖片

機Gor Report：P900一吋長一吋強

雖然Nikon P900嘅Size比Canon SX60 HS大咗成個碼，但機Gor覺得前者手感幾好，加上有成2,000mm超遠攝焦距，不僅可用嚟影木棉花，禮賓府杜鵑、中大荷花、大棠紅葉等一年四季用嚟郊遊影相都掂；而且對焦速度都算快夾準，唔會成日Out Focus。雖然SX60 HS支鏡唔夠對手咁長，但仍有好多優點如支援Hotshoe可外加閃光燈，加上機仔細細機動性強，帶去旅行都係唔錯選擇。

Profile

機Gor

機不離身，不信Spec只信測試，不扮高深，懶理低俗，貪新不忘舊。

撰文：機Gor

模特兒：Sally（Gaiety）

查詢電話：（a）2907 1122、（b）3191 2333