Battlefield Hardline警匪新戰線

美國城市大鬥法

玩家在《Battlefield Hardline》之中，唔再係扮演軍人游走世界各地的戰場進行危險任務，而係變成警察或匪徒在洛杉磯及邁阿密市內大鬥法。不過玩家毋須太擔心新作設計，皆因它沿用《Battlefield 4》的Frostbite 3遊戲引擎及Levolution機制，如在Downtown地圖上，玩家可用起重機將大樓拆毀，逼真性跟臨場感十足。當然，遊戲主題改成警匪大戰，用嘅武器就冇原版咁重型及多元化，但都可以使用不少槍械及電槍攻擊。

單人模式劇情認真

遊戲的單人模式中，炮製了好有電視Feel嘅劇情，玩家要扮演新紮警員在罪惡城迎接一宗又一宗棘手案件，廠方更找來美劇演員在遊戲演出，製作認真。始終故事跟戰場上「唔係你死就係我亡」嘅設定不同，玩家並非一味開槍殺敵，如扮演警探時可用上掃描裝置幫助緝拿疑犯，既可從遠距離測定疑犯位置，又可同時掃描記錄隱藏罪證。遇到多個疑犯時，玩家仲可大叫「Freeze」，然後擎槍瞄準疑犯並上前拘捕，但小心如果時間拖得太長，疑犯會群起發難反擊。

雖然跟原版的重型武器不同，但遊戲中可動用的槍械都有不少選擇。

主角探員有拍檔隨行，這幕既要為同伴止血又要跟衝入來的匪徒駁火。

駕車搶旗玩法特別

《Battlefield Hardline》針對兵捉賊、賊人走佬等背景，設計了幾個有趣嘅多人模式。如在Heist模式中，扮演搶匪一方要將打劫銀行的金錢，以貨車運往指定位置，而警方要總動員竭力制止，只要搶匪成功逃走便會完結。Rescue模式顧名思義是拯救人質，玩法是以5對5作賽，扮演警方的一方要於限時3分鐘內拯救人質，在這模式雙方都只得一條命，死了就不可重生。而Hotwire模式更加有趣，玩法同唔少射擊遊戲嘅搶旗戰相似，不過今次係要駕駛車輛搶旗，仲要邊駕駛邊駁火，既考駕駛技術又講臨場應變。在香港發布會上，大會擺設了24台PS4作單人模式及連線對戰，畫面表現比Beta版有進步，有興趣玩吓新風格嘅射擊遊戲，絕對值得一試。

Games Effect成員Zero表示，單人模式故事設計雖有心思，但不能Skip稍嫌長氣。

日前在香港舉行的遊戲發布會，共設有24台PS4供傳媒試玩。

DETAILS

類型：射擊

開發：Visceral Games、Electronic Arts

平台：PS4、Xbox One、PS3、Xbox 360

售價：$449

查詢電話：2359 7998

撰文、部分攝影：布偉倫