Moto 360行貨實測型格玩味

近期間間大廠都力谷Android Wear產品，以抗衡Apple Watch勢頭，但論外觀，剛有行貨抵港嘅Moto 360可說是表表者，單係圓形簡約復古設計，配以真皮錶帶，足以迷倒一眾對高科技有興趣嘅手錶愛好者。

IP67防水防塵

Moto 360早於上年連同Android Wear系統一同發布，等到9月先喺美國開賣，直至年底才有水貨抵港，推出時間比對手遲得多。但遲到好過冇到，其外形似足復古手錶，不銹鋼圓形錶殼厚約10mm，錶面備有Corning Gorilla防刮玻璃，加上支援IP67防水防塵標準，粗戴都冇問題。至於行貨分別有黑色皮帶配黑色錶框，以及石紋灰錶帶配銀色錶框兩個版本，用上美國皮革老牌Horween錶帶，質感唔錯；可惜暫時未有美國官網提供嘅Cognac啡色皮帶、DODO多色皮帶及鋼帶款式。

自訂錶面

新錶採用Android Wear作業系統，與手機配對後，畫面會以卡片形式顯示電郵、日曆、社交網絡等提示內容。另可透過預設選項或語音輸入回覆，當然唔少得以「OK Google」語音指令查看及設定內容等。還可記錄用家步數、行走距離、量度心跳率及消耗卡路里。廠商推出了《Motorola Connect》工具，可查看Moto 360連接狀態及電量，並可自訂Watch Faces錶面及輸入身高、體重等資料。