近日重新報名做Gym，鐵尚未舉起，已悲從中來。
去Gym有多煩，我之前都受夠了。話說以前在「第尾」做Gym多年，卻為退會手續出現問題曾不斷收到大耳窿來電，大耳窿說：「間Gym話你未交最後幾個月喎。」我說：「我同佢哋達成協議，已經正式做好退會，佢哋話會計部會通知你唔使再追數。」大耳窿說：「但係會計部冇通知我喎。」我說：「咁你聯絡會計部囉。」大耳窿說：「我係負責追數唔係負責聯絡會計部。」
見過鬼，有點怕黑，Left In The Dark，但沒做運動太久，決定重新下海，去「非洲」報名，付足了錢，以為可以從此輕鬆做運動，我預了有關方面要我試試1小時免費訓練，以游說我參加其他付費課程，而我亦笑笑口應付說：「我都好明白你哋只係做好份工，如果我有需要先至搵你哋報名啦。」但沒想到時到候就有人來電：「陳先生，你幾時得閒做1小時免費訓練？」我說：「唔係做咗啦咩？」他說：「你做咗拉筋啦咩？」我答：「做晒啦。」他說：「咁即係未做打Boxing。」我答：「都做咗。」他說：「咁即係未做負重運動。」像電影《Groundhog Day》，無法逃出那個1小時黑暗深淵。
我問朋友：「點解去Gym、減肥、修身、美容等等事情要搞得咁鬼複雜？」朋友淡然說：「只要涉及會籍同月費，其他嘢就會一直跟住嚟，你一日未落搭，佢哋一日都搵你。」
網址：www.chan-wai.com