雖然喚作Concert in the Dark，但今年《暗中作樂》的記者招待會，在一個毫不黑暗的海港城海運大廈展覽大堂──即是逢周末周日做車展之處──隆重舉行，出席者超多，包括創作總監于逸堯，以及一眾歌手如張敬軒、容祖兒、倫永亮、陳潔靈、RubberBand及其他……我將其他歌手以「其他」總括，因為比較方便討論……
站在身旁的傳媒朋友說：「講真，我淨係識得嗰幾個歌手，其他係邊個，我真係唔知囉！」我沒好氣說：「你有冇第二句o架？你自己做傳媒有冇稍為留意吓先？」朋友解釋：「以前梅艷芳、張國榮、羅文嗰啲，打扮似番個明星，行出嚟個個都與眾不同，依家個個都着流行時裝，同街邊市民有乜分別？」朋友的話，不是沒有理由。
後來大會宣布，會有一名「神秘天后」於最後一晚演出，我問創作總監于逸堯：「係唔係唔講得？」于逸堯說：「真係唔講得。」路人甲插口：「林憶蓮吖嘛？」大家靜了半晌，于逸堯問：「邊個講你知？」路人甲答：「應該係睇報紙知。」于逸堯嘆氣：「總之我冇講過啦。」
當今樂壇，能夠擔得起「神秘」或「壓軸」而仍然令人有所期望的，男的只有張學友，女的只得林憶蓮。歷代很多所謂樂壇天王天后要靠電影、電視、廣告、緋聞、信仰、結婚、生仔來維持人氣，只有這兩位最貨真價實。所以，就算她躲在黑暗，大家還在想她。
網址：www.chan-wai.com