西班牙直擊！Lollipop變招大亂鬥

HTC手環搶鏡　旗艦壓場

近期HTC十分積極，Dual Sim手機出完一部又一部，不過作為旗艦機的One系列則只會每年出一部。今年MWC便帶來全新M9，齋睇個款跟上代M8極為相像，鋁製一體化機身及BoomSound雙前置喇叭都保留下來，但新機加入玫瑰金邊，機殼的髮絲紋更細緻無瑕，廠方話工序達到「珠寶級別」！新機沿用5吋1,080p屏幕，未升呢到2K芒難免叫人失望，幸好改用Snapdragon 810處理器、3GB RAM及2,840mAh電池，速度同續航力都得以改善。

影相係新機另一賣點，主鏡頭提升到2,000萬像素，表面有藍寶石水晶保護，唔怕刮花。前置鏡頭則改用UltraPixel技術，比一般鏡頭吸多3倍光線，喺低光環境下都可Selfie靚相。同場還發表了運動手環HTC Grip，不僅可詳細記錄跑步距離、身體循環數值等，更擁有IP57級別防水功能，最正係可與Under Armour運動裝置同步數據，完全為好動人士而設計。

M9外觀跟上代接近，保留BoomSound雙前置喇叭。	前置鏡頭改用UltraPixel技術，自拍更亮麗。	鋁製機身型格高貴，鏡頭仲升呢到2,000萬像素。
HTC Grip設有曲面PMOLED屏幕，充滿電可用到2.5天。	LG展區人頭湧湧，不少人來試玩新一代智能手機。	Magna提供5吋屏幕、1.3GHz四核心處理器及800萬像素鏡頭。

LG機海戰術 鋼錶吸睛

LG今次冇乜勁機推出，改而以量取勝，發布Magna、Spirit、Leon及Joy４款新機，全部走中階路線，設計靈感來自G3，備有圓渾仿金屬機身及Rear Key背掣，4款手機均支援LTE制式，並搭載Android 5.0系統，想平平哋玩Lollipop的話大可考慮。同場發布的智能手錶Watch Urbane更加爆，不銹鋼圓形錶殼配標準22mm皮帶，齋睇樣已夠搶鏡，還內置1.3吋OLED屏幕、1.2GHz處理器及700mAh電池，唯一奇怪係運行WebOS，似乎想擺脫Android Wear框框喎！

新機加入Rear Key，設計猶如G3倒模。	Watch Urbane以不銹鋼打造，一改膠製智能手錶的土氣。	A7000支援Dolby Atmos技術，可微調均衡器及音效設定。
10.1吋平板TAB 2 A10備有藍、白兩色，預計今年4月開售。	VIBE Shot背面激似相機，厚7.3mm、重145g，非常輕巧。	提供模式切換掣，輕輕一推便能選擇專業或智慧模式。

Lenovo VIBE Shot手機DC結合

今時今日手機兼備DC功能，Lenovo索性將兩者二合為一，旗下VIBE Shot正面似手機，背後則完全是DC造型，提供1,600萬像素鏡頭、O.I.S.光學防手震及LED閃光燈，最正係有埋快門掣同模式切換鍵，操作勁易上手。同場還有A7000及TAB 2 A10，前者是一部5.5吋手機，後者則是10.1吋平板，它們均支援Dolby Atmos音效技術。小記戴上耳筒試聽，層次感非常好，音源定位輕易分辨到，不難成為手機音效新潮流。

Sony為宣傳新機的自拍功能，特別搵來遊戲主角Sackboy撐場。	Z4 Tablet可配合BKB50藍芽鍵盤使用，打字反應好快！	M4 Aqua奉行Omni Balance簡約美，可惜5吋720p屏幕未夠靚。
Huawei TalkBand B2可抽出藍芽耳機獨立使用。	放大圖片	ZTE Smart Projector 2只有書本咁細，極易攜帶。

Sony Z4 Tablet明晒靚芒

之前盛傳會發表Xperia Z4的Sony，雖然到最後冇咗影，但卻有Xperia Z4 Tablet平板登場，採用10.1吋2K屏幕，並轉用64-bit八核心處理器及3GB RAM，配合BKB50藍芽鍵盤便可像Notebook般打字。同場另有中階機款Xperia M4 Aqua，集Snapdragon 615八核心處理器、88度超廣角自拍鏡及IP65/68防水防塵能力於一身，今年春季上市後定能成為女士新寵！

現場花絮 現場有不少攤位布置用上Android公仔作主題。	MWC一如過往在Fira Barcelona會展中心舉行。	現場當然不乏Show Girls，炒熱會場氣氛。

同場加映：內地廠商 出奇制勝

Huawei推出新款智能手帶TalkBand B2，配備六軸感應器、加速計及陀螺儀，備有白、銀、金3色錶身，並支援IP57防水防塵規格。雖然屏幕只有0.73吋，但可分體使用，將藍芽耳機獨立抽出。

另一內地大廠ZTE則推出Smart Projector 2，它是一部Android投影機，重量只有550g重，機面備有5吋720p芒操控，能投影出120吋畫面，用來煲戲一流。

特派記者︰陳志滔