賀歲識走「位」踢出文昌運

近年香港的室內足球場如雨後春筍般湧現，想同朋友踢番場賀歲波旺一旺都好Easy！若各位想旺上加旺，便要請玄學顧問龍震天師傅指點一下，他表示羊年吉位分別是正北方的正財位、東北方的橫財位、西南方的喜慶位、正東方的桃花位同西北方的文昌位。咁啱新開張嘅MVP室內足球場坐落喺香港西北方嘅屏山，一於約埋天行元朗港超球員，齊齊踢番場「羊年賀歲杯」！

港超天行元朗球員張子鍵、張志勇、黃梓豐、馮啟匡（前排左至右）、陳嘉晉、彭梓鍵（後排左至右）踢番場賀歲波應節。

西北【文昌位】：11,000呎室內派對

今年四綠文昌星位於西北方，有利學業運之外，亦因文昌星管科名，有助專業考試等運勢。新開嘅MVP室內足球場位處屏山，旁邊就係屏山文物徑，踢完波遊埋圍村同古蹟都好方便。講番今次嘅賀歲波，新場比同類球場有唔少特別之處，第一是夠大，佔地11,000平方呎，當中除了劃分成兩個球場外，仲有好闊落嘅休憩空間。採訪當日天行元朗6位球員圍埋打PS4《Winning Eleven》時，仲有大把位剩，足以容納幾十人開Party。球場老闆之一同係天行元朗球員余浩邦「朗尼」，佢話場內仲設有電動麻雀機，男士去踢波時，女士們一樣可自得其樂。

5人場草地靚

由於想做到真正5人場嘅感覺，故場內不設圍板，而且龍門大小同真正5人場一樣，達3×2米，加上球場鋪上新簇簇嘅人造草，仲玩埋陰陽色設計，係小記踢過嘅同類球場中，「草地」質素最理想嘅一個。球場雖然主打5 Vs 5比賽，但「朗尼」話較多人喜歡打4 Vs 4。如果大家搞賀歲杯時想男女朋友一齊踢，仲可玩埋時興嘅泡泡足球，隨時「碰」出好運來！最重要係收費比其他場平，新張優惠期內嘅平日傍晚6點前只係$300一小時，星期六、日都只係每小時$500，就算未必100%催到運，舒展吓筋骨都好啦！