facebook紅人教路攝戰煙花匯演
諗唔到今晚有乜好節目？年初二晚梗係去維港兩岸欣賞羊年煙花匯演啦！若然覺得齋睇唔夠喉，仲可帶齊攝影裝備拍照留念，皆因今年加入了「羊」、「春」、「和」等字的特色煙花。一於請兩大facebook攝影群組流浪攝及Fotobeginner嘅紅人，傳授大家拍攝煙花技巧，就算未影過煙花嘅初哥都可輕鬆上手。
掌握爆發時間
唔好以為流浪攝淨係識得攀山「攝」水，其實佢哋瓣瓣精，拍攝過不少煙花作品。咁點先為之合格嘅煙花相呢？流浪攝自有一番見解：「影煙花最基本要有一張黑卡，配合B快門及多重曝光，影完每款煙花後以黑卡遮住鏡頭，便能於同一畫面影到幾款煙花。不過記住要避開煙花爆嗰一下，因為爆芯過度曝光會變成白色一片，代表唔合格，應該待煙花爆開才拎走黑卡，練習多幾次便可掌握到時間。」
多重曝光構圖
煙花匯演嘅時間只有廿幾分鐘，時間非常緊迫，所以事前要熟悉相機嘅設定和操作，除了要避免畫面過曝或曝光不足，腦裏都要清晰構圖，流浪攝表示：「香港煙花嘅最大特色係連續發放，所以玩多重曝光時，腦裏面要諗好高低位嘅構圖，避免同一處有過多煙花重疊。」並建議在尖東海旁拍攝，事關與煙花距離太近，就算廣角鏡都未必可覆蓋到全部煙花，相反企遠少少可預留更多構圖空間。
人氣3人組流浪攝
Profile：Tony、露伊和聯師兄3人組成的流浪攝，喜歡游走高山險地影靚相。不時背着攝影器材攀山涉水。
夢幻失焦效果
好多人會問影煙花應該揀乜鏡？Fotobeginner導師霆鋒就話長短鏡都會用到，廣角鏡影大環境，長焦鏡影煙花特寫，通常70~200mm已夠用，而且大特寫影出嚟嘅相唔會人有我有。他補充：「可嘗試刻意玩失焦效果，首先以無限遠手動對焦Focus煙花，然後打開黑卡，再將對焦環扭至Out Focus，便能夠影到半清半朦效果，拍攝時最好預鬆少少位置，方便後期裁剪。」
金紫荊作前景
其實玩刻意失焦有一定難度，一來要預計煙花位置，二來要快手扭對焦環，如果想簡單啲，霆鋒建議利用前景點綴。「雖然尖沙咀文化中心係熱門影煙花地點，影過去有會展作背景，但需要好早去霸位。不如考慮灣仔金紫荊廣場，可利用會展和金紫荊作前景點綴一下。」此外，他提醒大家匯演早段時盡量影多啲，事關冇風的話好難吹散煙花留下來的煙霧，同時留意天文台風向，避免站在煙霧吹向的位置。
Fotobeginner群組導師霆鋒
Profile：攝影技巧教學網站Fotobeginner，提供入門攝影知識予網友，其導師霆鋒期望初學者都能享受影相樂趣。
農曆新年煙花匯演詳情
日期：2015年2月20日（年初二）
時間：8:00pm
地點：維多利亞港
費用：免費
網址：www.lcsd.gov.hk/eo
撰文：黎子豪
部分攝影：盧展程（部分相片由受訪者提供）
模特兒：Natalie（Pure Models）