出門好時辰歡樂慶新春

乙未年運程透視

寶源師傅話今年乙未羊年，天干係乙木，代表小花小草，而地支未土，雖然代表陰土，但同時代表陽氣消盡，意思生命能量欠奉，原本小花小草生於濕土中，是遍地開花大喜之象，百業能百花齊放，但因欠生命力，所以繁榮現象只屬嚟匆匆去匆匆。羊年香港經濟年初會有小陽春現象，秋天後就會急速放緩，同時木是指思維和見解，遍地開花即今年無論學術或政見上都會湧現好多新見解，但勿太過追捧，全都會曇花一現，意見過度分歧，政府要挽回民望，絕對回天乏力，同時陽氣衰而陰氣盛，緋聞和造假新聞不時會出現擾亂視聽，大家勿過於先入為主，失了正確的判斷力，同時陰氣重，除了風災、水災要特別留意外，瘟熱病毒等更會大幅蔓延，大家千萬要保重身體，有病就要去睇醫生，切勿諱疾忌醫！

最強勢出門時間

今年早於2月4日就立春，年初一前已踏入羊年，但師傅話年初一係節氣轉換之日，所以流年運程亦會喺今日開始加強影響，想一年到尾都行好運，今日就要先做一個好開始。而喺大年初一，大家都會去上頭炷香，而最佳出門時間當然係子時（晚上12點至1點）啦！之後1點到3點都不宜出門，但3點之後就完全冇問題。至於想出門拜年嘅朋友，今年唔好嘅時辰只有辰時和申時，即早上7點到9點同埋下午3點到5點，其餘時間都係出門拜年同埋歡度佳節嘅好時間。

放大圖片	師傅預測今年香港運程，真係要小心留意呀！	上頭炷香嘅最佳時間，記住係子時呀！

招財添福方位

師傅話今年流年飛星嘅財星在北方，想增加財運，最好就係出門向北方走，每走一步都幻想自己，被北方嘅財寶能量，貫滿全身上下，為了更有效果，就係走至銀行門口不妨喺提款機攞一百蚊出嚟袋入銀包內，因為有財星嘅能量，代替坊間嘅招財符。而初一日《通勝》記載嘅財神和貴神都在西方，所以本應往西方走，但今年正西同時係五黃災星同埋三煞位所在，所以建議改往北方求財。

想今年財源廣進，年初一出門最好往北方走吸吸財氣！	想增桃花嘅朋友往正東走完再食粒糖，甜甜蜜蜜！	師傅教大家小占卜，有興趣不妨玩玩！

人緣桃花秘技

今年初一喜神位在西南，加上流年飛星代表如意喜慶嘅紫微星飛入西南，所以理應出門朝西南走，但當天五鬼和死門就在西南，正反兩種能量，此消彼長，為免空歡喜一場，所以想求桃花人緣嘅朋友，可以選擇正東方，此方位正係流年飛星中嘅桃花位，能助旺人緣桃花，所以出門不妨朝正東走，期間幻想自己被粉紅色嘅能量不斷加持，愈來愈變得人見人愛，為了加強效果，求桃花嘅朋友可以走入便利店買一款自己最喜歡嘅糖果，畀錢後隨口吃一粒，取其甜蜜之意，同時呢款糖果亦成為你整年增添桃花運的象徵物，每次進食都會獲得加持！

要把家中尖刀收好，否則有可能傷人於無形。	最好咪食白粥，原來會影響一年嘅運程。	食飯時切勿預多筷子在枱上，老人家會十分避忌！

賀年禮物小占卜

新春期間，無論去人家拜年或親友來訪，總會收到大盒小盒嘅新年禮物，師傅話年初一收到嘅賀禮數目，不妨總結一下，原來內有乾坤，可以把你今年嘅運程預測一下。

沾滿一身新春氣息，回家一洗就會付諸東流！

大小朋友收了利是都別太心急拆開，否則會影響運程呀！

占算方法：把所有禮物總數加起來，以四去除，除盡以四代表。其餘一至三連同四，看下列解釋就知道所代表嘅未來運程。

餘數一：代表地，今年你的運程不錯，充滿機會，但係要有人相助至會成功，如果找不到志同道合嘅朋友，這些機會靠你一個人是很難開展的，所以今年在尋找機會同時，認識多些朋友都十分重要。

餘數二：代表水，今年你的運程比較停滯，沒有往時咁火熱，建議你養尊處優，不妨進修一下，充實一下自己。此外，亦不妨多參與些公益活動，令自己認識一些新朋友，到時機成熟就能一飛沖天！

餘數三：代表火，今年運程比較反覆，一時機會處處，一時無人問津，所以決定方向時就要三思，切勿機會來時，就猶豫不決，到機會走時，就全力出擊，那樣想成功都難，做個敢想敢做嘅真漢子吧！

餘數四：代表風，今年可以發展的機會隨處可見，但要小心當中有真有假，至於如何分辨真假？不可以全部相信你身邊的人，不妨遇事去問一些你唔認識嘅朋友，可能會畀到不錯嘅意見助你成功！

注意事項

1.刀具

勿用刀尖指向別人，好多朋友年初一時都會把剪刀或菜刀收起來，原因是怕被刀子所傷，其實刀子就算不直接傷人，原來以刀尖指向別人時，身處嘅能量亦會由刀尖折射到被指的人身上，如身處不好嘅方位，被指的朋友身上就會植入不好氣場能量，如在病位就會生病，在破財位就會破財！

2.白粥

勿食白粥，好多朋友都話年初一係彌勒佛寶誕，所以有人會食齋，但其實食素食葷都冇所謂，但過年期間，特別年初一不能吃粥，總要食啲米飯，代表一年都豐衣足食，但如只食粥，除代表唔飽肚外，病人才會食粥，特別係白果粥，因為咁更會代表今年一事無成，樣樣事都食白果！

3.筷子

勿留多出的筷子在飯枱上，大年初一好多時都會去親友家中拜年，到食飯時真係會唔知人數，於是好多朋友攞筷子時都會攞一大堆，到埋位時至發現多出一兩對，建議見狀即刻取回廚房，如進餐後才發現，老人家們會好唔開心，因為傳統只會拜祭時才會無人留筷，為免大家尷尬，記緊留意！

4.洗頭

回家勿洗頭，古時傳統大年初一係不可以沖涼洗頭的，有解釋話因為怕天寒地凍，加上食飽肥肉飲咗酒，怕會容易感染風寒，但香港地就算過年都唔係好凍，照計冇有怕，但其實年初一出門在外，或多或少都會帶點吉祥嘅氣場回來，如果一回家就用水沖洗乾淨，那不是如入寶山空手回嗎？

5.利是

勿急着拆利是，有啲家庭一返到屋企就會把全家大細收回來嘅利是全都拆開，睇吓收入與支出有冇落差，如果有落差就怨天尤人，其實每封利是嘅重點不在金額，而係一份祝福，呢份祝福能夠保持愈久，對你運程就愈有幫助，一回家就拆，所有福氣都會不得其門而入，所以千萬咪心急拆利是！

撰文：余家洋、布永德

攝影：陳世昌

玄學提供：寶源師傅

模特兒：Ruby、Bonnie@reborn production　Yan、Collus@gaiety