花車匯演行大運五福臨門

1.大飽眼福 最佳欣賞地點

巡遊路線與歷年相若，花車隊伍會由香港文化中心廣場出發，途經鐘樓再沿廣東道右轉海防道，最後進入彌敦道至喜來登酒店為終點。由於部分道路如海防道兩側位置較窄，可容納遊人數量較少，故小記建議各位可到大會提供的最佳觀賞位置，包括廣東道海港城跟新太陽廣場一帶，以及彌敦道、北京道與中間道交匯處一帶去欣賞節目。而經過此區域時，巡遊隊伍會稍作停留表演，可說是睇Show最佳地點。

國泰航空新春國際匯演之夜

日期：2月19日（年初一）

時間：8:00pm~9:45pm

地點：尖沙咀香港文化中心廣場（開幕典禮）

途經：香港文化中心 > 廣東道 > 海防道 > 彌敦道 > 喜來登酒店

網址：DiscoverHongKong.com/ChineseNewYear/

2.福星高照 6:30pm表演開騷

花車匯演將於今晚8:00pm舉行，屆時尖沙咀一帶定必人氣沸騰。其實大會早於6:30pm喺巡遊沿途路線安排了大量本地「星級」表演團隊，更搞搞新意思玩Crossover，如將魔術和芭蕾舞結合，社交舞配上敲擊樂等。廣東道更首設DJ點唱站，由創作組合「平原習作」Live獻唱，另有魔術大師李行齊作魔術表演。不過要留意5:00pm起尖沙咀一帶有改道措施，建議各位預早乘搭港鐵或小輪前往。

3.迎春接福 巡遊前奏有着數

為慶祝新春巡遊匯演20周年，現場大約喺6:00pm起於沿途路線，大派共98,888張價值$30之餅券，唔使等初七「人日」已有蛋糕食，另有脆條及朱古力曲奇畀大家做茶點，好讓大家邊食邊睇騷。為咗炒熱氣氛，仲會派一對金銀打氣棒，到時巡遊兩旁一片金光閃閃，夠晒好意頭。

4.有福同享 海外團隊獻藝

今晚嘅戲肉自然係巡遊匯演，焦點落於主題公園設計嘅花車。為慶祝澳洲歷奇主題園區即將開幕，海洋公園特別以樹熊、紅頸袋鼠及笑翠鳥設計花車，配合土著圖案包裝成南澳布局。此外，一家大細都鍾意嘅迪士尼樂園花車，以繽紛花海打造，象徵萬物生機勃勃，而米奇老鼠等角色均會穿上賀年服飾同大家拜年。表演隊伍中則有10支國際團隊來港獻藝，其中較有特色是法國The Divas，以五光十色的奇幻服飾唱歌跳舞，荷蘭Ballerinas Stilt Walkers更會表演高蹺芭蕾舞，美國美式足球隊丹佛野馬的啦啦隊，更會即場施展渾身解數。

5.四方福氣 附近商場好去處

去尖沙咀行大運，冇理由唔逛吓附近嘅商場，影吓新年布置兼消費一番，招攬四方福氣，好讓大家年頭旺到年尾！以下便有人氣熱點畀各位參考。

撰文：廖俊斌