日本直擊：CP+變種DC超相像

日本CP+展覽於今天正式閉幕，今年可說是歷屆最熱鬧的一年，幾乎每間相機廠都有新產品發布，唔會純粹為咗擺攤位搶風頭。然而無論大廠細廠都開始變陣，展出一啲非傳統DC，好似Olympus首玩鏡頭形相機、Panasonic為相機植入Android系統等，唔理佢哋點樣變種，總之以後肯定有更多嘢玩！

Olympus AIR A01百變鏡頭

驟眼睇Olympus AIR A01同普通鏡頭形相機接近，不過小記拎上手試玩時，發覺佢的骰小巧之餘，仲可安裝自家Micro 4/3鏡頭，然後透過Wi-Fi操控。現場攤位展出了更多變種玩法，有啲真係估佢唔到，除咗基本嘅夾手機影相之外，另可懸掛喺橫樑上充當CCTV監控攝錄。最搞鬼係廠方推出了膠感十足嘅相機形外殼，合體後宛如一部相機，不禁令人想起「國產凌凌漆」嘅偉大發明。現場更設有3D打印機，可替AIR A01打印出合適的手機殼、保護套等配件，吸引到不少參觀者一玩再玩。

Panasonic激薄Android相機

另一邊廂Panasonic都有矚目新品發布，所指的是植入Android系統的LUMIX CM1相機，小記都要大排長龍先至玩到，初試時感覺機身好薄，睇番規格才知佢最薄處只有15.2mm，背面用上4.7吋大芒，配以28mm定焦鏡頭，仲可插入microSIM卡上網，唔講仲以為玩緊手機。最過分係佢內藏1吋大Sensor，能夠拍攝4K@15fps影片，唔係部部相機做得到。展區另有「女友七號」GF7無反相機，加入180度翻揭式屏幕，之不過玩完CM1後，就唔會覺得GF7好細部！

廠方展出相機形外殼，套上AIR A01後令外觀變成一部相機，相當搞笑。

Toshiba請來空手道高手表演，讓在場人士透過新記憶卡儲存高速連拍相片。

會場示範多種AIR A01玩法，其中一種係吊在半空扮監控鏡頭。

Ricoh Pentax多機齊發

今年Ricoh Pentax展出中階單反K-S2，今次唔玩花巧嘅閃亮機身設計，改為加入側揭式屏幕走平實路線，而且支18~50mm新鏡都相當有睇頭，用上伸縮設計能收納成一支餅鏡咁細。DC機仔方面有WG-5 GPS五防相機，備有14米防水、2.2米防撞、攝氏-10度防寒、100kgf防壓及防塵功能，規格算係大路。最吸睛反而係廠方展出了仍在開發中的全片幅單反，型號尚未命名，雖然「封印」喺玻璃箱內，但吸引到唔少人圍觀，小記要左攝右攝先埋到去。

NHK擺放了一部8K電視，不過部電視咁細部，好難睇得清楚喎！	Show Girl以Cosplay打扮力谷Benro腳架，吸引唔少人影相。	Sony試相區別出心裁，上方有隻假麻鷹不停咁轉，下方就有火車模型供拍攝。
CM1備有4.7吋大屏幕及microSIM卡槽，規格勁似手機。	GF7無反相機配備180度翻芒設計，自拍Easy Job。	放大圖片
K-S2中階單反加入翻芒，18~50mm鏡頭用上伸縮設計。	KWG-5 GPS備有五防規格，迎合戶外影相需求。	廠方展出全片幅的樣本機，有意進軍Full Frame行列。
大廠新品一覽 Nissin 副廠閃燈Nissin推出AIR 1閃燈遙控器和Di700A閃燈，利用NAS系統連線可對應廿多支閃燈。	Sigma Sigma Quattro系列長玩長有，今年新機dp0 Quattro用上21mm超廣角鏡，不過支鏡長咗好多。	Casio Casio推出18倍變焦的ZR1600機仔，還以短劇方式介紹，示範實際拍攝情況。
Fujifilm Fujifilm X-A2無反的外觀復古，屏幕能向上翻175度玩自拍。	Fujifilm攤位人流最多嘅係試玩區，場內擺放了電單車及索模任影。