1:6復仇者隊長愛得太「磁」

小改款見細節

由第一集《The First Avenger》畀人鬧到飛起，再到《The Winter Soldier》畀人讚到上天，美國隊長的口碑猶如其一生大起大落，正因為上集電影的成功，好多粉絲都對新Figure寄予厚望，加上Chris Evans真人演埋呢集，就剩下2016年上畫的《Civil War》片約，所以粉絲要買Figure記得把握呢兩年。今次美國隊長戰鬥服屬小改款，例如繼續以車線縫製剪裁，肩膊及腰位有精細嘅凹凸紋，軍Boot沿用分件處理等。然而驚喜在細節裏，心口嘅五角星標誌多了一道紅藍色胸線，並延伸至兩邊膊頭，感覺更神氣。而之前玩家投訴舊作胸口太平，今次廠商詢眾要求幫佢「加操」，心口凸番健碩嘅胸肌，同時布料保持延伸性，舉臂掟盾等動作唔會硬晒軚。

手掌吸實盾牌

打從Hot Toys首隻美國隊長Figure開始，頭雕都維持極高質素，今次亦唔例外，繼續由廠商王牌組合Yulli及JC. Hong分別負責雕刻及上色，五官輪廓似足真人，而且罕有地採用斜視表情，較一般木獨直望表情擬人得多；另有一個頭罩Look畀大家替換，一雞兩味難怪連外國玩家都讚佢係「The Best Cap. Ever」。配件方面，與隊長形影不離的圓盾，今次落重本以合金打造，有質感又夠分量，最破格係手挽加入磁石，只要為Figure換上特製磁石手掌，便可將盾牌吸實，此舉既切合戲中造型，亦唔怕盾牌太重令隊長「不舉」，可謂一舉兩得。

人偶約高31cm，提供多達30個關節。	圓盾手挽藏有磁石，可吸附於特製磁石手之上。	頭罩Look驚喜不大，最大亮點是A字及兩邊花紋的金屬塗裝。
身為復仇者隊長，膊頭當然有Avengers標誌。	附送8隻造型手，其中兩隻內藏磁石。	將3代美國隊長一字排開，可見新版（右）的戰鬥服，融合了《The Avengers》版（左）及《The Winter Soldier》Stealth S.T.R.I.K.E. Suit版（中）兩套特色。

＊圖片所示屬產品原型，與最後完成品或有少許分別。

查詢電話︰3722 3988

攝影︰蔡浩文　

撰文︰陳志滔