達人教路手機洗白白
就快到年廿八，傳統會喺呢日之前洗邋遢，以迎接新一年。除咗將屋企打掃到乾乾淨淨之外，今時今日當然要幫日日跟身嘅手機進行大掃除。手機少不免有指模、面油、塵埃等，今次一於搵嚟達人馬Sir教路，講解正確嘅手機清潔方法，齊齊同愛機喜迎羊年！
專用清潔劑及用品
開辦手機維修課程多年嘅HPC電腦教育中心，其導師馬Sir表示：「手機污垢簡單可分為表面可見及不可見兩類，前者係指一般塵埃、油漬等，後者係指細菌。」見到屏幕污糟，好多用家會用紙巾就咁捽，他教路：「就咁抹好難完全清除手機表面嘅污漬，最好加埋專用清潔劑，它可清潔大部分污垢，而且揮發速度較快，用喺電子產品安全得多。切忌使用白電油抹芒，因為它有一定腐蝕性。」
此外，抹塵布都要講究，馬Sir指絨布、衣物等通常會甩毛，只會愈抹愈多塵，最好使用無塵布。至於鏡頭、充電等位置，如果有塵埃的話，位處不深可使用掃或吹塵泵。「大家還可使用清潔軟膠，它帶有一定吸力，可有效帶走污漬，千祈唔好使用膠紙或Blu-Tack，隨時會留低膠嘅痕迹。」
軟件大掃除都有計
手機外觀變得靚仔，如果系統操作龜速咁慢都幾冇癮。其實大家可下載一些軟件清理Apps，以《360 Security》Android免費App為例，它集清理加速、電池優化、安全防毒等功能於一身，可清理兼釋放背景唔用嘅暫存和垃圾檔案等，仲有埋騷擾攔截、流量監控等功能，令手機時時刻刻都咁爽快。
部分攝影：蔡浩文
模特兒：Kianny（Inflate）
撰文：林子聰