Tricking空翻轉體「武」動極限

功夫融入體操

如各位喺YouTube搜尋Tricking，會發現短片內嘅動作有啲似功夫又有啲似體操，原來這運動正是融合兩者之表演元素。香港首個以Tricking為主題的訓練中心Trickstation，負責人兼教練Rodney表示：「Tricking最先喺美國流行，改良自空手道比賽入面嘅自創套路（Creative Form），參加者喺入面加添體操、音樂等元素，慢慢演變成今日嘅Tricking。其實細分仲有XMA Tricking，XMA全寫為Extreme Martial Art，會加入更多武術元素如拳腳、馬步等。」

男女老幼啱玩

訪問當日，眼見學員左飛右踢，動作快得嚟又連貫，坦白講就算慢鏡重播都未必睇得清楚，好在有Rodney幫手拆解：「Tricking基本分為四大元素，包括武術（Martial Art）、踢腳（Kicking）、轉體（Twisting）、空翻（Flip），後兩者屬於體操類別。」此外，打機成日話要連招Combo，原來Tricking一樣玩連續技，在短時間內將所有動作融合並做出連貫招式，對身體柔韌度、體能和爆炸力都有一定要求。不過Rodney話Tricking對年齡和性別冇特別限制。「細至5歲大至50歲嘅男女學員都有，最重要係揀啱訓練方式，逐步提高身體柔韌性及體能。當然後生仔嘅爆炸力會強啲，掌握技巧嘅時間相對較短。」

動作示範 Tricking動作大部分講求騰空、身體協調及控制力等，必須經過長時間專人訓練，小朋友千祈唔好亂學。 旋子360（Butterfly Twist）： 首先要注意轉體時間，另外身體收放時間亦要合適。	旋子動作（Butterfly Kick）： 要留意旋轉角度、蹬腳力度、騰空高度以至腳後擺力度等。	側空翻（Aerial）： 先決條件是側手翻動作一定要做得穩妥，蹬腿、後擺腿亦必須夠力，有足夠騰空和速度方可完成。

循序漸進練習

既然係咁，小記同Model都蠢蠢欲動試玩一下，Rodney竟然立即叫停：「我哋每堂要用10~15分鐘拉筋，因為Tricking動作要大幅度伸展手腳，熱身不足或者動作過度好易拉傷。」咁柔韌性高啲咪有着數？他續道：「柔韌性高的話，做前踢腿等動作嘅幅度夠大，理論上會靚啲，不過都要配合相關肌肉先得；就算柔韌性不足，只要動作做得啱，循序漸進慢慢練就得，切忌心急以致受傷。」Tricking常見嘅動作有前後側手翻、空翻、直踢、旋踢，進階啲有凌空轉身嘅旋子360等。練習前後側手翻及空翻必定要有教練在旁，前者要用手撐地做出翻騰動作，後者仲要靠吊繩練習，而旋子動作要由蹬腳、跳起、擺腳等動作拆開逐步練，一定要有耐性同付出汗水。

訓練睇真啲 學旋子動作先要搵支撐物扶住，協調蹬腳、跳起及擺腳等。

練空翻要利用吊繩，教練拉繩時要用力抱膝跳起，之後可嘗試做出空翻動作。

講求創造力

「Tricking嘅玩法其實好自由，可以自己組合花式，最好當然Combo連接得流暢，好似踢腳加空翻相對容易，難度高會連續空翻。」Rodney補充：「想柔韌性高啲可以拉筋，想跳得高啲可練爆炸力，想體能好啲可多做Sit Up和Push Up，仲要練埋心理質素，譬如空翻到一半突然冇膽做埋落去就好危險，訓練絕對有助壯膽！」至於點樣欣賞Tricking，不少人覺得動作Combo多跳得愈勁就愈好，而教練話動作最緊要清脆穩陣，當然仲要講求創造力，即係組合出複雜嘅Combo，標準同體操有點相似。

要學側手翻，必須搵教練輕輕扶住腰部，再畀力將腳揈出。

Trickstation負責人兼Tricking教練Rodney表示，除咗上堂前要Warm Up，落堂時都要Cool Down。

Tricking邊度學？

全港首間Tricking訓練中心Trickstation，每逢星期一、二、四、五嘅晚上都備有課程供學員練習，此外還有體操、巴西戰舞、跆拳道等課程選擇。此處部分日子會提供Open Floor時段，開放予Tricking愛好者一展身手。

活動詳情

費用：$130 / 1堂、$580 / 6堂、$980 / 12堂（成人）$100 / 1堂、$520 / 6堂、$920 / 12堂（學生）每節$50（Open Floor）

地址：荃灣德士古道62~70號寶業大廈B座2樓3Y室

查詢電話：6506 7109

撰文：林子聰

部分攝影：盧展程

模特兒：Charlotte（Pure Models）