KT Football單挑！張國強試腳 通坑渠致勝

改善傳統踢波問題

甫進入觀塘工廈的室內場，工作人員已忙於將球場充氣，KK邊幫手邊說︰「我哋叫呢個做『氣場』，約24呎長、17呎闊，基本上泵幾分鐘就搞掂，唔踢時又可以收番，只要有心，24小時都踢到波！」他續指，KT Football最初由前國家隊女足成員劉力豪於2011年發明，旨在解決傳統足球空間、時間及人數等問題。「日本人口比中國少，但註冊足球員多達65萬人，相反中國足球員只有8,000人（以2012年KT Football官方資料統計），落差咁大就係因為訓練設施唔夠。香港面臨同一個問題，所以KT Football絕對大有可為！」

規則知多啲

KT Football的KT即Kick Tempo咁解，規則跟傳統足球不同，例如通對手坑渠後再控定足球即可KT勝出。此外，球員不能踢高波，也不能將球踢出場邊，球出界則控球權交給對方。而龍門半徑一公尺內為禁區，不得停留超過5秒，違者可被對手在中場射罰球。

KK話想得踢得叻就要練熟弓字腳，既方便走位，也避免對手乘機通坑渠。

放大圖片

3分鐘踢到氣咳

「氣場」泵好後，係時候落場試腳。KT Football的規則很簡單，比賽時間3分鐘，既可1 Vs 1，也可2 Vs 2，入球得2分，通坑渠得1分，高分者勝出。聽落同一般足球冇乜分別，但竅妙在於隨時可反敗為勝，原來只要在通坑渠過人後，在球碰到場邊前立刻控制住，則無論當前比分如何也能直接勝出，這種情況稱為KT，情況如同拳賽的KO一樣。「咪睇少得3分鐘比賽時間，中間冇暫停冇得抖，選手不停走上走落攻擊同防守，仲要好冷靜以避免被對手KT，少啲技術同體能都唔得！」小記落場同KK過兩招時，的確Feel到比踢全場仲攞命，而且冇得踢高空波，想贏就要用多啲撞牆或扭波，難怪KK話踢得多可磨練技巧啦！

KT Football對年齡性別沒有要求，拍攝當日兩母女玩到不亦樂乎！

裝備一覽 低彈足球 採用特製4號波，柔軟低彈力，並印有QR Code，以便記錄資料。

人氣抵港 攻入工廈

KT Football提供球場及設備租借服務，收費為每3小時$3,500，詳情可致電9356 3859查詢。如果唔想踢3小時咁長的話，位於觀塘工廈的PLAY，預計於農曆年後將引入此運動，可按場次或時段計費，詳情記得留意其網頁www.321play.com.hk。

氣場 充氣式足球場，長24呎、闊17呎左右，兩邊各有小龍門，售價約$23,000。

平底波Boot 禁止穿鋁釘、金屬釘或活動釘的波Boot出賽，一般多用平底波Boot。

用手機拍片記分

KT Football另一賣點係數碼化，除咗每場都有節奏強勁嘅音樂做陪襯，每個選手仲有專屬QR Code以記錄個人身份、往績及累積分數，同時裁判也有手機App輔助，可以一邊記錄分數，一邊把比賽情況串流到網絡，讓其他人即時觀賞。目前KT Football在全國23個城市都有俱樂部，香港、台灣、新加坡仍在萌芽當中，今年8月上海將舉辦首屆「起源地盃」，讓全國高手決一高下！KK指出，香港選拔賽不日便會舉行，有興趣的話可先經微訊註冊成會員，之後到有KT球場的場地比賽累積分數。「我哋嘅目標係激發更多人踢波，幫香港發掘好波之人！」

撰文︰陳志滔

攝影︰胡振文