「螢」戰Dodgeball出奇制勝

近年香港冒起不少室內Game場，有的玩密室解謎、有的打War Game，相信不少人都玩過，但呢類遊戲都有一個缺點，就係一次生、兩次熟、三次玩到悶。有見及此，開咗僅兩個月嘅Hyperspace喺室內人造草地場加入螢光元素，主打Neon Dodgeball閃避球等球類活動，喺昏暗環境下利用紫外光燈造出螢光效果，讓玩家靠着黑暗中的光芒攻守互動，刺激感頓時倍增！

螢光球衣是特別訂製，玩閃避球時可自行塗上螢光物料。

互擲鬥球定勝負

Hyperspace跟香港其他室內場嘅定位唔同，負責人Jerome表示：「有次無意中上網見到外國嘅大學，夜晚喺室內運動場玩閃避球，成身穿晒螢光裝束、掛上螢光棒、手握螢光鬥球互擲，所以照辦煮碗將螢光物料塗滿室內場，配合裝設於橫樑嘅紫外光燈營造氣氛。玩家只需穿上螢光球衣及波襪，便可利用特製嘅鬥球作賽。」至於閃避球嘅玩法，與平時所玩嘅分別不大，因應運動量及人數可選擇打全場或半場，工作人員會先用螢光道具劃出場區及外圈，5~6人一隊每節打15分鐘。規則以簡單為大前提，只要投擲鬥球擊中對方身體，而對方或其隊友無法接實來球，便要退到外圈擔任狙擊手；如狙擊手成功打中對手，便可即時返回場中。當每節打完時便可計算場中球員數目來定勝負。

黑麻麻外圈偷襲

既然玩法跟傳統閃避球一樣，咁螢光閃避球有乜好玩呢？Jerome解釋：「由於喺昏暗環境作賽，視野局限會令玩家的距離感及準繩度有所偏差，外圈偷襲也較易得手，就算平日打得幾叻嘅朋友都要重新適應。」為咗準確地應對隊友傳球，Jerome建議玩家不妨將鬥球傳至隊友大約耳旁位置，以便單手接實時可順勢採取攻擊，如果內場和外圈隊友之間互相傳球，更能擾亂對手。此外，擲球攻擊亦有竅門，如靠近中線飛躍投擲打短距離快攻，專注命中雙腳會令對手不能及時應對。「雖然有些賽例要求直接擊中對手，不可利用彈擊得分，以及限制場內傳球次數，但由於這個室內場以玩樂性質為主，不妨放寬規例和打法，工作人員亦欣然擔任裁判。」

閃避球貼士 <BR>閃避球並非一味亂擲來戰勝對手，技巧和戰術同樣重要，以下便有3招貼士畀大家參考：<BR>飛躍投擲：靠近中線飛身投擲作短距離快攻，令對手不能及時應對。

閃避球貼士
閃避球並非一味亂擲來戰勝對手，技巧和戰術同樣重要，以下便有3招貼士畀大家參考：
飛躍投擲：靠近中線飛身投擲作短距離快攻，令對手不能及時應對。

傳球擾敵：隊友之間互相快速傳球，能擾亂對手令其產生誤判。

外圈偷襲：透過傳球及假動作，製造機會讓隊友於外圈狙擊。

同場加映：螢光泡泡足球

Neon Dodgeball運動量大，女士可能較輸蝕，如想男女都啱玩的話，另可選擇螢光泡泡足球！原來Jerome與一班夥伴本身係「Bubble Soccer」成員，亦是首批在港引入泡泡足球的先驅，不過眼見這玩意日漸普及，因此搞搞新意思以螢光物料炮製特殊泡泡衫，喺黑暗環境下只見到兩種顏色嘅充氣波波互撞，配合聲音辨別隊友走位，驚險刺激。除咗螢光球類運動之外，其餘地方仲設計成一個巨型派對場地，包場可以打桌球、擲飛鏢等，仲可以喺寬敞嘅客廳玩體感遊戲，相當多元化。