迎戰渣馬！耳機「樂」伴隨

仲有幾日就到渣打馬拉松，相信各跑友已準備好行裝。有見近年愈來愈多人鍾意邊跑步邊聽歌，小記特別搵嚟長跑好手兼教練蘇凱男（蘇Sir），測試4款熱賣嘅無線運動耳機。揀啱合適裝備加上有計劃地練跑，下年渣馬隨時可做出PB（Personal Best）呢！

今次測試的4款運動耳機，全支援藍芽無線技術，無論iPhone或Android陣營嘅手機都啱用；亦由於運動專用嘅關係，所以耳機都支援不同程度嘅防汗防水功能，跑到大汗淋漓或遇着落雨都唔怕整壞耳機。一於請今年報咗全馬嘅蘇Sir，試戴各款耳機跑步聽歌，點評耳機嘅舒適度、操控性等。

BackBeat FIT屬Plantronics旗下首款運動耳機，跟耳機附送一個同色嘅雙面彈性保護袋，反轉就能充當運動臂帶，可以用嚟擺放手機，一物兩用。

「耳機輕身靚聲之餘，仍清楚聽到外面環境聲，線材長短適中，戴上耳仔亦夠穩陣，大力跳動時都唔會甩出來。我特別鍾意佢嘅按鍵位於耳殼上，撳掣時好易摸到；可惜未有獨立音量鍵，校大細聲冇咁方便。個人最唔慣反而係運動臂帶，我習慣將手機袋喺褲袋或者腰包，戴咗臂帶會覺得雙手唔平衡。」

穩妥舒適：★★★★

靚聲操控：★★★

（評分以5粒★為滿分）

AfterShokz Bluez 2為市場上少見嘅耳骨傳導藍芽耳機，已推出到第2代，只需將耳機擺喺耳朵附近，毋須塞進耳仔便可聽歌。最近除咗黑色之外，仲加推搶眼嘅青綠色。

「一體式頭帶設計好似頭箍咁易戴，耳機出奇地唔易移位，而且唔使塞住耳仔戴得舒服。不過佢只得One Size大小，男士應該好Fit，頭形較細嘅女仔可能覺得唔夠貼服。由於它利用耳骨傳聲，音量感覺較細，喺較嘈嘅地方可能唔夠聲，而佢嘅優點係完全聽到環境聲，感覺好似四周有音樂伴隨咁自然。」

穩妥舒適：★★★★

靚聲操控：★★

（評分以5粒★為滿分）

丹麥耳機品牌Jabra出品的Sport Pulse Wireless，單睇型號已知道佢具備心跳偵測功能，只需利用《Jabra Sport Life》App便可量度心跳，還可計算體能、攝氧量等數據，專為運動人士而設計。

「耳機夠輕身，不過線材稍長，全速跑嘅時候有機會揈嚟揈去。最實用係有心跳偵測功能，雖然冇心跳帶測得咁快咁準，但唔使心口箍多條帶，絕對方便得多，練習時可參考心跳率嚟調整跑速或者訓練強度。」

穩妥舒適：★★★

靚聲操控：★★★

（評分以5粒★為滿分）

Soul係近年勁Hit嘅潮牌，Run Free Pro採用黑藍扁線設計，外形用色均相當有型，唔做運動時當作普通耳機戴出街都唔突兀。耳機仲特別支援aptX技術，低音更顯突出。

「戴住跑步時明顯感到隔音能力好強，聽落同入耳式耳機接近，適合需要自我空間嘅跑手，或者喺室內跑步時使用。不過跑街時就要小心聽唔到環境聲而發生危險。此外，耳機雖然輕身，不過耳塞稍嫌大舊咗啲。」

穩妥舒適：★★

靚聲操控：★★★★

（評分以5粒★為滿分）

平時有聽開歌跑步嘅蘇Sir表示：「聽歌可有效調節到情緒和節奏，對於跑長途、重複性高嘅路線特別有幫助，甚至有跑手會預先選定曲目，例如初段揀慢歌，中後段選快歌。不過戴耳機跑步需要時間適應，尤其係戴眼鏡嘅跑手，多會覺得耳機頂住眼鏡臂而感到不適，所以記得試清楚耳機是否合適自己。」

前香港田徑隊成員，10公里、半馬拉松、3,000米障礙賽前青年紀錄保持者，現身兼中學田徑隊教練及Nike+ Run Club總教練。

撰文：林子聰

部分攝影：蔡浩文

查詢電話：（a）2395 3913、（b）2553 1151、（c）2201 7233、（d）2262 1173