美國CES直擊！G Flex 2刮起曲芒韓風

LG第2代曲芒手機 刮背不留痕

初代G Flex曲芒手機相信令唔少人留下印象，事隔一年多終於推出第2代。今次G Flex 2採用5.5吋P-OLED曲面屏幕，機頂及機底微微彎曲，將佢壓到變平都唔會爆芒，而且解像度升級至全高清質素，顯示細緻自然。機身顏色方面，除咗上代有嘅Platinum Silver灰色，仲追加 Flamenco Red黑紅漸變新色，背殼還用上特別塗層，除咗防污之外，仲識得將刮痕自我修復，現場工作人員以鋼刷狂擦機背，約10秒後花痕便自動消失，夠晒神奇！此外，新機植入首次登場嘅Qualcomm Snapdragon 810 64-bit八核心處理器，配合最新Android 5.0系統，將最快最新嘅軟硬件集於一身，廠方話月尾會喺韓國開賣。

Samsung 27吋彎曲電腦 規格強勁

呢邊LG玩曲芒，另一韓國大廠Samsung都有曲芒新品，不過唔係手機，而係首次登場嘅曲芒AIO電腦。ATIV ONE 7 Curved備有27吋全高清曲面屏幕，正式將曲面技術帶到家用電腦層面，它內置Core i5處理器、8GB RAM、128GB SSD及1TB HDD雙硬碟，規格強勁。另支援Samsung Link、SideSync 3.0等功能，前者可無線讀取手機內的資料，後者則可於PC上控制手機，擁有GALAXY系列手機嘅用家最啱用。同場仲有全新8吋平板GALAXY Tab Active，概念同之前推出嘅S5 Active接近，支援IP67防水防塵，最特別係其4,450mAh電池用上可更換設計，買多舊電池便可延長續航力。

G Flex 2採用窄邊框設計，配合環形髮絲紋機身，感覺高貴。	曲芒弧度唔算誇張，袋落褲袋都唔會突兀。	即場以鋼刷刮着機背，示範自我修復功能，花痕隔一段時間會自然消失。

同場加映：其他新品一覽

除了韓廠之外，當然有其他代表登場，美國大廠Dell便推出嶄新設計的XPS 13手提電腦，其13.3吋屏幕採用超窄邊框設計，令機身更細更輕，體積同傳統11吋手提電腦差唔多！

GizmoPal屬手錶形配件，專為小朋友而設計，家長透過《GizmoPal》App可查看小朋友位置，另可撥號至預設聯絡人。	新推出嘅SSD T1硬碟，面積細過一張卡片，傳輸速度達每秒450MB。	電腦機背設有多組USB及HDMI插口，仲有埋天線方便睇電視。

至於出開手機嘅Alcatel，則加推OneTouch Watch智能手錶。而Kodak以IM5開拓智能手機市場，最大賣點係可透過Remote Assist遙距操控手機功能，夠晒Gimmick。

GALAXY Tab Active外形粗獷，戶外用都唔使怕。	用上曲面屏幕，睇戲、煲劇效果更好。	ATIV ONE 7 Curved機身設計比上代更流線，配備無線鍵盤及滑鼠。
現場花絮 D-Link新款Router AC5300，紅色外形加上8天線設計夠浮誇。	Polaroid特別喺攤位提供道具為入場人士影相，個個都扮鬼扮馬。	有廠商展示電子試衫系統，可說是女士夢寐以求嘅產物。
XPS 13備有13.3吋窄邊屏幕，便攜性相當高。	破格窄邊！ 窄邊設計令機身可以更細，拍埋同尺寸嘅MacBook Air就知細咗一截。	手錶突圍！ Alcatel OneTouch Watch智能手錶，可計算心跳、步行距離等資料。
遙距操控！ 平時出開相機嘅Kodak都發布Android手機IM5，仲玩遙距操控。

特派記者：林子聰