美國CES直擊！780g LaVie Z 輕鬆跑出

13.3吋筆電 輕盡全城

自MacBook Air推出之後，好多筆電廠都視之為假想敵，但做來做去都唔係輕佢好多，今次LaVie Z贏得更有說服力！它屬Lenovo與NEC合作推出的機款，分別有HZ550及HZ750兩個型號，驟眼睇黑色外形並不搶眼，但小記將HZ550拎上手後當堂嚇親，皆因13.3吋機身竟然只重1.72磅（約780g），比同尺寸、重2.96磅嘅MacBook Air輕一大截，相當誇張。現場仲擺放咗日本市場專屬嘅NEC版，吸引不少人圍觀和試玩。規格方面，HZ550用上Core i5處理器，HZ750則採用更強嘅Core i7處理器，兩者均配備128GB SSD；兩機另一分別是前者僅得4-cell電池，後者就用上6-cell電池，值得期待。

Lenovo於AquaKnox擺設攤位，有大量新產品任玩。	現場展出Pocket Photo Printer，可無線與流動裝置連接並列印相片。	Lenovo推出嘅New Glass，外形和功能似足Google Glass，不過要喺頸部位置孭多舊電池及主機。

ThinkPad新成員 更多玩法

除咗玩輕身嘅LaVie Z，為慶祝ThinkPad系列賣出1億部，廠方特別加推第3代ThinkPad X1 Carbon，它與上代同樣採用2,560×1,440解像度嘅14吋屏幕及Core i7處理器，特別在改用PCIe介面的SSD提升速度。新機亦因應用家要求，將鍵盤上方的功能鍵換番做實體鍵，用落更好手感；加上電池續航力大增至10.9小時，白領一族實啱用！此外，ThinkPad Yoga系列亦一次過推出12、14及15吋型號，均備有多種變形擺法，15吋型號更支援Intel RealSense 3D鏡頭，視像應用時可移除背景及作體感操控。不得不提係ThinkPad新成員Stack配件，它將藍芽喇叭、外置充電器、Wi-Fi盒及外置硬碟4樣常用嘅配件組合，可像積木般獨立拆開或結合使用，例如藍芽喇叭加外置充電器能提供長達48小時播放時間、Wi-Fi盒加外置硬碟則可變成無線存取裝置，讓用家因應需要而自行組合。

現場擺放咗NEC Logo嘅日版LaVie Z，當中HZ550重量只有約780g，輕得驚人。	CES會場有唔少表演，炒熱現場氣氛。	第3代X1 Carbon外形同上兩代接近，僅重1.31kg。
ThinkPad Yoga 15繼承Yoga系列特點，提供多種擺法。	Stack每個組件都加入磁石，供用家任意組合。	Stack可獨立或組合使用，而且沿用ThinkPad風格設計。

搶試流動新品 環形閃燈最正！

現場當然唔少得廠方近年極為重視嘅平板和手機新品，平板方面有Yoga Tablet 2 AnyPen，外形設計與Yoga Tablet 2相似，但預載Windows 8.1作業系統，最實用係支援AnyPen技術，隨手攞支鉛筆或原子筆等即可手寫畫圖，現場示範時仲搞笑地攞棵紅蘿蔔來寫字。手機方面有P90及VIBE X2 Pro，同樣用上64-bit處理器及2GB RAM，效能中上。其中VIBE X2 Pro的機身以3層不同顏色嘅金屬組合而成，側面睇似足一件三文治，其前後置鏡頭仲有1,300萬像素畫質，自拍靚相有保證。新機仲有樣專屬配件Selfie Flash，簡單嚟講係一個迷你Ring Flash，內藏8枚LED燈，插入機身嘅3.5mm插口即可使用，試玩後發覺閃燈光源好平均，影人像效果幾好，如果其他手機都用到就Perfect！

Yoga Tablet 2 AnyPen支援AnyPen技術，用乜嘢筆都可以寫字。	VIBE Band智能手錶備有1.43吋e-ink屏幕，支援通知提示及記錄運動數據。	Selfie Flash設計輕巧，亦夠光猛，影友必Like！
從側面睇VIBE X2 Pro，好似三文治咁有3層。	P90備有5.5吋全高清屏幕，最吸引係內置4,000mAh電池。

查詢電話：2516 3938

特派記者：林子聰

鳴謝：Lenovo