冬日白機 攝戰嘉年華

α6000 4D Focus速度快

據場內老友講，Sony自從將NEX換成α系列後就愈來愈好賣，尤以α6000最受歡迎，早前只有黑色和鈦金屬色選擇，上月才加推白色版，擺明為冧女而設計。細問之下，老友又Sales上身咁介紹「4D Focus」乜乜乜，原來新機識得預先幫用家對焦，4D即係時間，令追焦捕捉動態影像時更迅速穩定，配合16~50mm Kit鏡，Snapshot快夾妥。

α6000 4D Focus規格表

感光元件：2,430萬像素Exmor CMOS

轉換系數：1.5倍

屏幕：3吋92萬像素

儲存媒體：SD、MS

體積：120×66.9×45.1mm

重量：285g（淨機身）

EOS 100D白色Kit鏡至夾

單反通常都好笨重，一般女生未必有興趣，但Canon EOS 100D無論尺寸同重量都極之纖巧，廠方早前同日本少女潮牌LOWRYS FARM推出冬日限定相機帶谷銷量添。機Gor覺得最特別係白色機身竟然可配埋白色Kit鏡，備有40mm F2.8餅鏡及今次用嚟測試嘅18~55mm標準鏡套裝可揀，配合3吋觸控屏幕，篤芒操控和揀相更靈活。

售價：$4,980（連18~55mm鏡頭套裝）、$5,780（連40mm F2.8鏡頭套裝）（b）	α6000配備3吋反芒，可上揭90度及下翻45度，取景容易。	雖然機仔細細，但凸出的手柄上備有快門掣和C1功能鍵。

EOS 100D規格表

感光元件：1,800萬像素CMOS

轉換系數：1.6倍

顯示屏：3吋104萬像素

儲存媒體：SD

體積：116.8×90.7×69.4mm

重量：373g（淨機身）

第1回合：鬥連拍追焦

α6000與100D同樣採用APS-C尺寸感光元件，前者Sensor為23.5×15.6mm，後者則用上22.3×14.9mm CMOS，理論上吸光唔會差太遠，不過100D連拍追焦速度始終唔及主打4D Focus的α6000。機Gor以嘉年華內的「Crazy Cars」機動遊戲實試，在同一位置以兩機追蹤反斗車王急速掟彎，睇吓有冇Focus錯隔籬。α6000一按快門已能快速對焦兼拍攝，完全感覺唔到Time Lag。至於100D嘅表現都唔差，不過構圖時要預留時間去估計主體嘅移動方向，高下立見。

100D的3吋屏幕支援輕觸操控，睇相時左掃右掃就搞掂。	機身設有操控轉盤，拍攝模式一扭即用。	α6000（左）與100D（右）同樣Sell白色纖巧機身，並採用APS-C尺寸感光元件。

第2回合：鬥影像質素

現場有一個戶外溜冰場，一面溜冰一面可飽覽維港景色，不過冰面全白，好多時會考起相機嘅測光系統，機Gor用上相同焦距及自動白平衡等設定，發覺兩機嘅成像同樣出色，但α6000的色彩稍稍偏淡，而100D則維持EOS系列一貫和暖色調，影人像佔優。拍片方面，機Gor攝錄一段15秒全高清影片，α6000以AVCHD格式儲存，雖然50i質素的儲存容量只有45MB，但光度偏暗，色水灰灰沉沉；而100D以25p的MP4格式儲存有成88MB，畫面頗有電影感，令人喜出望外。

Win！ α6000成功捕捉機動遊戲，最高支援11fps連拍速度。	100D的對焦反應稍遜一籌，而且連拍速度只有每秒4張。	以α6000拍攝溜冰場︐成像細緻銳利，但顏色偏淡，拍片時甚至會偏暗。

第3回合：鬥操控方便

從機身尺寸看，α6000明顯Size較細，但100D嘅手柄較好揸，究竟邊部Snapshot操控方便啲呢？機Gor嘗試以不同角度影吓嘉年華，高炒低炒展覽攤位，發覺有得翻芒嘅α6000取景靈活，唔怕踎低起身見頭暈；加上機頂及機背分別有轉盤調校光圈快門，最吸引是機身植入Wi-Fi和NFC功能，一嘟手機即可過相Share上網，迎合女生嘅影相習慣。而100D主要靠機頂轉盤和觸控屏幕來調校設定，用落相當就手，但輸蝕喺冇Wi-Fi功能分享，靚相冇咁方便。

Win！ 100D色調偏紅，但跟橙色冰鞋的色調相當配合。

周景成（Edward）

達人教路：facebook攝影群組創辦人及導師周景成（Edward）：「玩樂取向各不同！」

「以定位接近嘅無反跟單反相比，前者無論機身和鏡頭都可造得更細更輕，便於收藏及攜帶，而且內裏『玩』嘅元素如濾鏡、模式等較多。至於數碼單反適合本身已擁有同廠鏡頭，或願意投資升級鏡頭的用家，換鏡選擇更添靈活。」

機Gor Report：α6000留住女人心

兩機初推出時都係玩黑色機身主攻入門用家，後來不約而同加推白色版搶佔女生市場，可見「小龍女」呢個Market幾有潛力，但喺操控和實用性方面，機Gor覺得Sony α6000較好用，加上有齊Wi-Fi傳相、場景特效等Gimmick嘢，不難留住女士嘅心。不過若各位有班龍友哥哥可長借Canon紅圈鏡嚟玩的話就唔同講法啦！

機Gor Profile

機不離身，不信Spec只信測試，不扮高深，懶理低俗，貪新不忘舊。

撰文：機Gor

查詢電話：（a）2345 2966、（b）3191 2333