喺普天同慶嘅大日子，除咗商場換晒聖誕裝飾，連Apps都唔例外，不少聖誕Apps瞬間登上熱門排行榜，各位不妨下載當中的特色遊戲、影相工具等，即場為派對聚會增添氣氛！
想扮吓聖誕老人應節？《Santify》可透過拍攝或匯入大頭相，讓軟件幫你化身成聖誕老人、聖誕婆婆、鹿仔等，由更換衣着到加入飾物都冇問題，而且聖誕老人仲識講嘢，錄番句Merry Christmas或Hohoho都得。
售價：免費（iOS）
大時大節例牌都會影吓相，若想更有聖誕氣氛，未必要搵街上嘅燈飾。《White Christmas》內置30多款聖誕公仔、字句等供用家加入相片，聖誕Feel即時升溫！
售價：免費（iOS）
雖然《Despicable Me》已經推出咗一段時間，但因應聖誕節加入如飄雪嘅冬日版圖，連迷你兵團角色都換埋聖誕裝束。玩法同以往一樣，控制角色左右跳高瞓低避開障礙物，途中仲要攞香蕉和道具。
售價：免費（Android、iOS）
曾幾何時極受歡迎嘅估字遊戲，原來近日有聖誕版！估字內容包括聖誕快樂、報佳音等，當中有唔少同節日典故有關，絕對係聖誕常識大考驗。
售價：免費（Android、iOS）
聖誕節又點少得聖誕樹呢？但唔係個個屋企都擺得落這龐然巨物，擺完仲要為收藏而煩惱，不如玩吓《Christmas Tree Fun》，內置一棵虛擬聖誕樹，可加上超過80款燈飾、裝飾、禮物及雪景等，效果搶眼，仲可滿足大家砌聖誕樹嘅心願。
售價：免費（Android）
撰文：林子聰