北京直擊！Honor 6 Plus雙鏡強攝

臨近年尾兼聖誕，各位應該已充滿Holiday Mood，連國產大牌Huawei都喺北京搞咗個大型派對，慶祝Honor系列誕生一周年之餘，仲發布旗艦新作Honor 6 Plus（榮耀6 Plus），最大賣點係加入800萬像素雙鏡頭，可拍攝出F0.95大光圈效果，配合八核心處理器、3GB RAM、5.5吋巨芒等規格，最平1,999人民幣即可入手！

機身採用5.5吋全高清屏幕，顯示清晰，可視角度不俗。

5.5吋全高清屏幕

今次發布會喺北京798藝術區的751 D-Park舉行，原址係煤氣廠，環境夠晒特別，估唔到連Honor 6 Plus都同樣破格！雖然直板圓角加上金屬邊框，驟眼睇同上代Honor 6相似，但機背改用玻璃纖維物料，網格暗花圖案相當突出，加上備有黑、白兩色之餘，再追加土豪金色，外形更搶眼。最明顯嘅升級係屏幕由5吋增大至5.5吋，備有1,920×1,080解像度，而且屏幕佔機面的面積達78.2%，配合7.5mm纖薄設計，手感唔錯。

F0.95光圈拍攝

新機最大賣點係800萬像素雙鏡頭，廠商話拍攝時雙鏡可同時捕捉畫面，吸光量及感光面積係單鏡頭嘅兩倍，令影相質素大幅提升，對焦速度仲可以低至0.1秒。聽落幾厲害，現場試拍又點呢？小記在體驗區試玩時，發現新機的對焦和測光都好準，而且內置多個拍攝模式，其中「大光圈」和「超級夜景」較有睇頭，前者可拍攝出F0.95~F16光圈效果的相片，拍攝後仲可調整景深效果；後者則類似慢快門模式，按下手機快門後等大概3秒才完成拍攝，相片雜訊明顯較一般手機少，影夜景一流。而前置800萬像素鏡頭支援10級美肌，Selfie必備。

售價：1,999人民幣（4G標準版）、2,499人民幣（雙4G版）

網格暗紋機背加入800萬像素雙鏡頭和LED燈。

待機畫芒操控

作為旗艦手機，硬件當然唔輸蝕，新機用上HiSilicon Kirin 925八核心處理器及3GB RAM，配合自家EMUI 3.0介面，撥頁、開Apps相當流暢。而且介面有唔少新功能，好似待機黑屏時，連按兩下「音量+」便可啟動錄音，連按兩下「音量-」即可拍攝；更支援「魅影觸控」，黑屏時畫下指定字母便可開啟如瀏覽器、播歌等功能，玩法特別。另備有「靈犀一指」，只要於屏幕貼上指定保護貼，屏幕便會增加5點觸控位，包括3個機面的虛擬功能鍵。新機於內地將推出4G標準版及雙4G版，前者屬電訊商定制版本，僅有16GB內存並不設NFC等功能；後者則同時支援TD-LTE及FDD-LTE制式，並內置32GB內存，兩款均由即日起至12月22日接受預訂，12月23日正式開售，暫未知香港推出詳情。