GALAXY A5金屬神器揮手即拍

一年容易又聖誕，商場四周都係應節裝飾布置，女士們又可以出動Selfie。Samsung乘勢加推GALAXY A5金屬手機，配備500萬像素前置鏡頭及多種美顏功能之餘，揮吓手即能自拍，連掣都唔使，力爭手機「神器」地位。

一體成形輕巧簡約

作為三千多元的中價手機，GALAXY A5罕有地採用金屬機身設計，拎上手雖然有點冰冷，但卻比一般塑膠手機更紮實。機身以鑽石切割技術打造，具線條美得來唔鎅手，而且厚度及重量分別只有6.7mm及123g，女仔單手操控都唔覺累贅，5吋芒嘅Size剛好可放入小手袋隨身攜帶。此外，新機是「銀河艦隊」中少有用上一體成形設計，好處是外觀簡約，但缺點係冇得換電，以2,300mAh電池來說，自拍要慳住使了。

64-bit運算兼容中港４G

規格方面，新機用上Super AMOLED屏幕，雖然解像度只有720p級數，但睇片時顏色鮮艷，在63,000:1對比度下黑白更顯分明。另備有Qualcomm Snapdragon 410 1.2GHz四核心處理器及2GB RAM，《AnTuTu》測試錄得20,110分唔算標青，不過它率先支援64-bit運算，日後升級至Android 5.0有望發揮功效。最重要是新機支援雙卡雙待功能，又兼容中港兩地4G及3G制式，中港兩邊走都可極速上網。

直角機身有點像同廠GALAXY Alpha，並搭載5吋720p屏幕。

主鏡頭及補光燈設於機背，但鏡頭稍稍凸出，小心刮花！

廣角自拍實時美顏

現今隨時都見到人Selfie，但影得靚唔靚好睇「神器」質素。新機配備1,300萬像素後置鏡頭及500萬像素前置鏡頭，並支援106度廣角模式，現場同Model玩群拍，連背景都影得一清二楚。另支援實時美肌、放大眼睛及瘦臉功能，各有8個級別供調校，不過Model話全部用盡都幾假，建議開3至4級就最自然，女士們要記住了。另一要讚的是語音及動作操控功能，簡單來說係對住鏡頭揮手或講出「Cheese」，即能感應並啟動手機快門，咁就唔怕自拍時手震啦！