聖誕檔期將至，不少人會留意近排有乜好睇嘅動畫上映，可是近期Pixar、Disney等大廠的出品，劇力和口碑非常參差。好在今年有一套驚喜，所指的是12月18日上映嘅《大英雄聯盟》（Big Hero 6），齋睇Trailer見到吹氣機械人Baymax已經Cute爆，主角濱田廣更係少有以日本人擔正，原來箇中竟然同Marvel英雄有關！究竟呢班細路邊度似英雄呢？等小記為各位一一拆解。
提起Marvel英雄，大家可能會想起Iron Man、X-Men等，原來呢啲只係冰山一角。美漫達人Jerome表示，千祈唔好將《大英雄聯盟》當成另一套《超人特工隊》去睇。「呢套同名改編作品早於1998年以《Sunfire & Big Hero 6》之名推出3期短篇，屬於《X-Men》的支線故事，2008年再推出5期續篇。」講述由日本政府建立的英雄隊伍，初期由Sunfire日火及Silver Samurai銀武士率領4位少年隊員組成，包括天才科學神童濱田廣、由他製造的生化保鏢並能變作龍的Baymax、利用皮包穿越空間的Honey Lemon、可將身體變成能量球爆炸的GoGo Tomago。後來Sunfire及Silver Samurai先後離隊，自此便由濱田廣帶領，再加入以氣手刀攻擊的壽司師傅Wasabi-No-Ginger及怪獸變形人Fred，維持日本治安。
一般Marvel電影的前期宣傳相當高調，但電影轉由Disney操刀卻未見大陣仗造勢。Jerome覺得觀眾在無期望的情況進場欣賞，反而會有驚喜，相信廠方會一探市場反應，再決定往後投資方向。「始終Disney只有自家角色跟《Toys Story》兩大殺着，希望購入Marvel後以《Big Hero 6》等滄海遺珠，可為觀眾注入新鮮感。」話分兩頭，雖然歐美方面的宣傳不多，但日本就邀請了上野春生繪畫前傳故事，並於《周刊少年Magazine》連載，漫畫更得到授權於台灣巴哈姆特作中文版網上連載，有興趣的話記得睇吓！
美漫向來筆鋒硬朗，怎可想像到《Big Hero 6》會變成合家歡電影呢？Jerome估計，今次電影是以2008年的續篇故事作參考，無論畫風及分鏡都比較少年風。他舉例：「如後期改成鐵甲人的Baymax，在電影中變成吹氣納米醫療機械人，連樣貌都變得笨拙可愛。」至於其他成員亦變得親民，如壽司師傅Wasabi會穿上盔甲手執先進嘅激光離子刺刀。同時Jerome留意到新作的設定有點似《Ben 10》，方便出玩具「吸金」。至於電影劇情當作新故事看待便可，講述濱田廣發明吹氣醫療機械人Baymax，捲入了一個足以摧毀城市的大陰謀，他立即為好友炮製拿手裝備，組成Big Hero 6拯救城市。過程中不乏Disney的無厘頭搞笑及溫情片段，難怪它於東京電影節開幕上映時引來大量好評。
撰文：廖俊斌