幾許瘋語 看透世事

點算出色「惡搞」？

「惡搞」一詞，源於日文「Kuso」，意思即是在原有的作品上進行二次創作，達致喜劇或諷刺效果。身兼填詞人及惡搞詞人的梁栢堅指，本地惡搞歌大致可歸納成4大派系，分別是無厘頭系、少少鹹多多趣系、政治諷刺系及毒男自嘆系，至於何謂一首出色的惡搞歌？「最好令人唔記得原有歌詞，以為惡搞歌詞就係原詞。」

而因惡搞歌詞出色而被邀成為填詞人的本地插畫家小克認為，令人發笑、引起共鳴是基本，更重要的是啱音，因為押韻是廣東話精髓，「所以我惡搞歌詞時，都會嘗試保留原詞的韻腳，但要做到一個韻都唔改，其實好難，可以畀我填到《一支得啩》都算係奇迹」。

梁栢堅

小克

最驚畫公仔畫出腸

創作本來就是需要認真對待的事，沒有一次或二次之分，只是在形式和心態上稍有分別。栢堅比喻：「填商業歌詞，要考慮監製的要求和歌手的形象等，情況就好似陪酒一樣，有錢收但冇揀酒飲的權利，惡搞就是自己跟朋友去蒲，冇錢收但飲咩可以自己話事。」至於創作過程，小克說：「就好似做餅一樣，商業歌要自己搓餅底加餡料，而惡搞歌就係人哋做好餅底你自己換餡料，因為唔使同監製交代，只要表達到自己情緒又夠好笑就得，心態上會輕鬆啲。」雖然只需對自己負責，但惡搞也有高低手之分，在栢堅看來，「就好似《一代宗師》咁，要比嘅係想法，係一啲高層次啲嘅意識，而唔係拳腳功夫。」而小克則鍾情以同一事件但不同角度惡搞歌詞，「好似《幾許瘋語》咁，惡搞歌詞都係講一個中年男人，只係商業版係成功人士，而惡搞版係失常人士，我隻《沙蟲》都一樣，原曲《沙龍》講影相，我就諷刺數碼化令攝影氾濫。」另外，他又以口碑電影《星際啟示錄》做例，指出好歌詞「魔鬼在細節」，下下「畫公仔畫出腸」，其實好無謂。

《龍虎豹好睇》 原曲：《夏日寒風》 填詞：不詳 主唱：軟硬天師（翻唱） 龍虎豹好睇 好睇 但係又好鬼貴 圖片美麗 顏色美麗 立體咁滯	《壽頭記》 原曲：《石頭記》 填詞：歡樂今宵編劇 主唱：撻成一塊（盧海鵬、廖偉雄） 聽遍了 冷冷清風 吹DiDa未夠 鞋踏破襪濕透 再看見 遠遠青山 醫院裏病友 唔食嘢扮消瘦	《又到聖誕》 原曲：《Santa Claus is Coming to Town》 填詞：黃霑 主唱：黃霑 喂又到聖誕啦又到聖誕 下個聖誕有無今年咁歎 鄧小平is Coming To Town

無懼立法 借歌抒悶氣

本地惡搞歌歷史源遠流長，由順口溜《雪姑七友》鹹濕版，到口耳相傳的《龍虎豹好睇》，雖略嫌低級趣味，難登大雅之堂，但已見惡搞歌雛形。至《歡樂今宵》出現，惡搞歌名正言順登堂入室，與80年代的廣東樂壇同步發展，雖於90年代稍微冷卻，近年卻東山再起，成為獨特的本地文化之一。其實只要仔細一看，就會發現不同時期的惡搞歌，都是該年代的最佳寫照，80年代經濟起飛，市民生活穩定，因此《歡樂今宵》的惡搞歌大都圍繞草根生活，以博觀眾一笑為主要任務；89年中英雙方簽署聯合聲明，社會開始擔心香港前景，黃霑和林敏驄便先後惡搞多首回歸歌，前者更出了張聖誕專輯，名字叫《香港X'mas》，用經典聖誕歌惡搞當年政治事件；到近年政局混亂，社會負能量飆升，以嬉笑怒駡方式諷刺時弊的惡搞歌便如雨後春筍，讓不少看不過眼又有冤無路訴的市民抒發心中悶氣。

《忘情釋迦舞》 原曲：《忘情森巴舞》 填詞：討論區巴打 主唱：鄉音門人 一起釋迦舞 撥走不滿 法印法印會相伴 一起釋迦舞 彈開不滿 讓法性與困惱交換 WOO

黃霑

是否時勢愈混亂，社會愈多問題，惡搞歌就會愈精彩？栢堅認為：「唔止惡搞歌，其他創作都一樣，好似改圖咁，有題材發揮，自然有較多好作品走出嚟。」小克更直言，「這是最壞的時候，也是最好的時候，社會愈多不滿，人民就愈要發洩，權力核心愈衰，自然就愈多人反抗，呢個係反彈嘅定律。」至於新一輪反彈，相信會跟俗稱「網絡廿三條」的版權修定條例有關，雖然經過上一輪諮詢，政府「知衰」急急推出2014年版草案，「放寬」豁免起訴範圍，不過小克跟栢堅二人已明確表示，人有思想自由，就算條例通過，他倆依然會繼續惡搞，「就算到時唔畀搞歌詞，都總會有其他創作辦法。」「就好似塗鴉藝術咁，明知犯法都會照做。」

惡搞鬼才10周年忌辰

說起惡搞，當然不得不提惡搞鬼才黃霑，今日是黃霑過身10周年的日子，梁栢堅及小克兩位對黃霑尊敬有加。梁栢堅受《不文集》啟發，打算寫書向鬼才致敬，小克指多得燴炙人口的武俠片歌曲，令該年代成長的人特別有義氣，「最重要是霑叔鹹濕得來又很有文化，是難得集兩個極端於一身的人辦。」

梁栢堅

填詞人、專欄作家。曾於銀行業潛伏10多年，填詞人身份初屬兼職，現已全職投入文字工作。惡搞作品有《富士康下》、《愛在元秋》及《相約中環》等。

小克

填詞人、創作人，活躍於插畫界，因在周刊連載二次創作惡搞歌詞而被邀請加入填詞人行列。惡搞作品有《滾》、《葡萄明目時》及《一支得啩》等。

Bonus MV

1. 《幾許瘋語》

原曲：《幾許風雨》

填詞：《歡樂今宵》編劇

主唱：羅人（盧海鵬）

身處高峰曾共阿姐天天都相見 偶爾碰上了秋官步伐未凌亂 心底之中失分寸 終於黐咗線 披荊斬棘的挑戰 青山不眷戀

2. 《大約是同志》

原曲：《大約在冬季》

填詞：林敏驄

主唱：曾志偉

沒有你的日子裏 我會更加珍惜廁紙 沒有我的歲月裏 你要抱住個電視機

3. 《一支得啩》

原曲：《一絲不掛》 填詞：臨食（小克）

主唱：煙Son Chan（陳奕迅）

兜落北角乜都戒到最想戒走承諾 這條煙絲扯到盡了 仍懶得脫落 又兩包逐根駁 貨幣掏盡憑煙稅揮霍

4. 《活佛Viva》

原曲：《活着Viva》

填詞：討論區巴打

主唱：漏奶

年輕得剃度誰亦能像波惹般乾脆 快活到 半日也像活佛一百萬歲

5. 《相逢何必曾燒衣》

原曲：《相逢何必曾相識》

填詞：電視台編劇、蔣志光

主唱：蔣志光

相逢何必曾燒衣 在這一息間相遇奈何橋 你請不必知道我是誰 無謂勁勁勁勁勁勁 勁勁勁勁勁勁 勁勁勁勁勁勁勁勁灑淚兒

6. 《相約中環》

原曲：《相愛很難》

填詞：梁栢堅

主唱：陳淑莊

可惜我 不智或僥倖 對餅糉天生敏感

撰文：吳倩瑩