KW1香水自拍王美顏挑機

提起自拍神器，大家可能第一時間諗起Casio扭擰相機，為了力挑「神器」地位，Sony早前發布外形似足香水樽嘅KW1，等到頸都長，終於有店舖從水路引入這部自拍王，除了備有白、紫、粉紅3色畀各位揀，仲植入多種美顏功能，想瘦臉、變大眼、美白一按搞掂。

售價：$8,980<br>附送的水晶質感支架能繫於機身底部，懸掛於戶外或座枱擺放都冇問題。

售價：$8,980
附送的水晶質感支架能繫於機身底部，懸掛於戶外或座枱擺放都冇問題。

鏡頭鑲嵌水晶

香水樽外觀配以流線身段的KW1，固然吸引到不少女士目光，其鏡頭旁還鑲嵌了兩枚Swarovski水晶和一盞LED燈，整體格調得以進一步提升。為了自拍時影得塊面更尖，新機特別用上21mm F2.0超廣角鏡頭，最正係鏡頭能作180度旋轉，方便自拍和以不同角度取景。機背則加入3.3吋OLED屏幕，能夠篤芒對焦兼影相，另可利用機旁的快門鍵單手自拍，點玩都咁就手。

長按屏幕約1秒，便會彈出倒數拍攝或連拍選項。

5種後製玩法

向「神器」挑機，不僅外形要獨特，自拍到靚樣先至係重點。新機支援多種美顏功能，能夠調校肌膚色調和平滑效果，想令膚色美白或者去除瑕疵一按搞掂，仲有10級強度供調校，試拍效果近乎完美。若然想執得勁啲，機身還提供後製功能，包括調校膚色、平滑效果、去除油光、放大雙眼和瘦臉5種玩法，執完相仲有得前後比對，想自然啲抑或落重「味精」由你話事。

水晶質感支架

今次廠方都幾貼心，跟機附有一個水晶質感支架，不僅令KW1睇落更奢華高貴，仲有實際嘅座枱和懸掛拍攝用途，自拍不再局限於手持角度。其實每次自拍都要逐次按快門，影多幾張都幾冇癮，故新機植入滑動快門功能，用家長按屏幕約1秒即會彈出倒數拍攝或連拍選項，備有2秒、5秒或10秒倒數任揀，仲可一口氣連拍4張咁多，畀各位有足夠時間換甫士轉表情。當然唔少得大熱嘅Wi-Fi及NFC功能，以對應嘅手機輕拍機側即可連接，之後便可透過《PlayMemories Mobile》App遙控操作及傳送影像。