曼谷直擊！Ascend Mate 7指紋觸動

6吋全高清芒

其實Ascend Mate 7喺9月頭德國IFA展覽已經發布，但當時只係試版，事隔個幾月終於有真機賣街，廠方遂於泰國曼谷大搞發布會，仲廣邀東南亞地區嘅傳媒出席。一如前兩代Ascend Mate及Ascend Mate 2，新機同樣玩大芒，但卻換上6吋1,920×1,080解像度屏幕，全高清顯示更細緻，配合IPS-NEO技術，除咗低功耗之外，可視角度仲比傳統IPS屏幕更高，幾斜睇都冇反白。外形方面，整個機背都用上鋁材製造，配合鋁合金支架夠硬淨之餘，手感相當紮實。雖然用上6吋大芒，但由於屏幕佔機面比例達83%，配合7.9mm厚度及185g重量，反而比同級大芒機輕巧。

機背指紋感應

發布會上，廠方着墨最多係機背9.16×9.16mm嘅指紋識別器，它有別於一般指紋功能，毋須由上而下掃手指，輕輕一掂即完成認證。小記現場實測，認證反應出奇地靈敏，基本上輕觸即可解鎖，而且將手指稍微傾斜都認到，最抵讚係就算個芒熄咗，手指一掂隨即着芒兼解鎖，比Apple嘅Touch ID更方便；加上指紋儲存喺晶片嘅Trustzone，認證過程仲有Secure OS加密金鑰保護，確保資料唔會外洩。此外，用家可將手機內嘅相片、音樂、影片或者檔案放入「保險櫃」，更可鎖定程式或者設定訪客模式，全部都要經過指紋認證才可解封，私隱度十足！順帶一提，新機喺內地同「支付寶」合作玩指紋付款，可惜香港暫時未用到。

6吋全高清屏幕色水自然，可視角度超高。

SIM卡及microSD卡槽需要用卡針打開，想換卡冇咁方便。

智能八核運算

Ascend Mate 7搭載廠方最新研發嘅Kirin 925八核心處理器，系統會因應運行嘅程式而自行調整核心運作，玩一般Apps會啟動功耗較低嘅A7 1.3GHz核心，運行複雜程式或遊戲時會轉用A15 1.8GHz核心，兼顧效能同續航力。新機亦支援LTE CAT 6制式，理論下載速度達300Mbps；另一加分位係內置4,100mAh大電池，並支援反向充電，廠方話到明可玩足兩天！新機先會推出2GB RAM配16GB內存嘅單卡版本，提供黑、白兩色選擇；稍後另會推出Dual 4G嘅雙卡版本，將內置3G RAM及32GB內存，仲有金色機身揀，值得期待。

內置單手操作功能，將機身向左一揈，機面嘅輕觸功能鍵會走向左邊。

遇着有彈出選項，將機身向上一揈，選項視窗便會向下移。

規格表

制式：GSM、WCDMA、LTE

現場花絮 Huawei廣邀東南亞地區傳媒及VIP，坐爆全場。	現場請嚟泰國著名歌手YaYa Ying表演。	記者會喺W Bangkok酒店舉行，門外仲擺咗個大Logo。

處理器：Kirin 925（A15 1.8GHz四核心加 A7 1.3GHz四核心）

胡慧沖	指紋按鍵可當做快門掣，Hold 2秒便能對焦兼影相，自拍零舍就手。	售價︰$2,580

記憶體：2GB RAM、16GB內存、支援microSD

屏幕：6吋（1,920×1,080解像度）

鏡頭：（前置）500萬像素（後置）1,300萬像素

對外連接：藍芽4.0、Wi-Fi、NFC、microUSB

電池容量：4,100mAh

作業系統：Android 4.4

體積：157×81×7.9mm

重量：185g

泰國通點睇？

嚟到泰國搞發布會，身為「泰國通」嘅胡慧沖當然撐場，佢試玩後大讚：「平時用開iPhone 6都有指紋認證功能，但Ascend Mate 7個指紋辨識器設於機背，用食指解鎖就手得多，辨識過程靈敏準確。另一要讚係佢嘅前置鏡頭夠Wide，方便四圍自拍擺上網！」

香港新機發布！Honor 6八核登場

日前Huawei在港推出Honor 6新機，集鋁合金框架、硬朗線條於一身，外形比一般國產手機討好，連內涵都勝人一籌，有齊Kirin 920八核心處理器、3GB RAM、1,300萬像素鏡頭，並對應4G網絡及2.4G/5GHz雙頻Wi-­Fi，規格超強！屏幕是此機另一賣點，備有5吋1,920×1,080解像度，加上445ppi像素密度及CE色彩增強技術，色彩鮮艷銳利。特別一提，此機還具有500萬像素前置鏡頭，並支援10級美顏、3秒倒數自拍及0.6秒快門啟動時間，並可加入大量濾鏡，用來Selfie一流。

特派記者：林子聰

鳴謝：Huawei

查詢電話： 3791 2856