Alphard 350管接送鯨吞大篋

囡囡：嘩！媽咪，今次測試咁大架車呀？媽咪：係呀，呢部豐田Alphard 350屬於七人車，車大內籠大，豪華又舒適，呢幾日都會由佢負責送你返學，包保坐得舒服。

囡囡：好嘢！咁聽晚Auntie Mary和Uncle Tom一家人搭飛機返嚟，媽咪係咪都會揸呢架車去接機呀？媽咪：當然啦！如果你聽日放學乖乖做晒啲功課，帶埋你去接機好唔好？囡囡：梗係好啦！有得遊車河又可以見到Auntie Mary。你放心，我聽日會好快做晒功課。媽咪：咁就乖嘞！

防夾遙控電趟門

豐田汽車（Toyota）旗下的MPV款式眾多，講到最豪華又舒適，非Alphard莫屬。擁有4,875mm的車長及1,830mm的闊度，營造無與倫比的大車廂，加上豐富的行車及乘坐設備，無論接載大個子、小朋友、家人或好友，都感到愜意。車上分別在前排及中排配備7吋輕觸式屏幕及10吋LCD影音顯示屏，前者用手指篤吓便可控制各項設定，如音響等十分方便，後者則讓中後排乘客邊欣賞娛樂節目，邊享受旅程。儘管車高達1,905mm，但低重心的設計，為高速行車帶來穩紮的乘坐感，上落更容易。此外，標配的遙控雙電趟門對應電門阻力探測器（即防夾功能），可減低小朋友或長者夾親「中招」的機會，體貼之極。

兩幅式天窗設計，全車皆可享開揚景觀。

前排真皮座椅設有電動調控。

中排Ottoman獨立座椅，可調校至半躺坐姿。

中排獨立座椅最舒適

今次借來3天詳測的Alphard 350，採用2+2+3座椅布局，中排Ottoman獨立座椅加入了電動調校，前往機場時，女兒將座椅調校成半躺坐姿，並打開腿墊，享受猶如飛機頭等艙般的舒適旅程，半路中途已不知不覺睡着，有幾舒服可想而知。到達機場後，只需簡單3個步驟便可將對摺式後排座椅收起，騰出更大的置物空間，擺放友人的大型行李，最終放置了3個大型行李篋後仍有位剩，即使多放兩個大篋都不成問題。講到最得筆者歡心莫過於車上裝有的Nanoe納米離子空氣淨化系統，有效改善車內空氣質素，連乘客的健康都照顧得到。

後排無論頭頂和腳位都有充足的活動空間。

3.5公升V6雙VVT-i引擎，最大馬力達到274ps。

加入了Nanoe納米離子空氣淨化系統，改善車廂空氣質素。

起步加速爽快有勁

Alphard 350採用3.5公升 V6雙VVT-i引擎，最大馬力和扭力分別為274ps和34.6kgm，加上配備加減波功能的六前速自動波，即使車身重甚至高負載，在強大扭力下，起步爽快勁力足。至於前麥花臣、後扭力桿懸掛設定，提供出色的吸震效果，經過凹凸不平路面也不會出現令人討厭的彈跳，只感覺浮一浮，毫不突兀。儘管Alphard屬於龐然大物，但A柱及小翼窗恰到好處，加上兩邊側鏡夠大，入彎、過線及睇位都相當輕鬆。泊車更是零難度，配備後波鏡頭對應中控台7吋屏幕，就連我呢個師奶仔都覺得勁Easy。經過3天試駕，儀錶板顯示的平均油耗為9.8km/L，以目前油價計約$1.7/km，數字屬合理水平。